Sý tasqyny: negizgi qaýip úsh óńirde saqtalyp otyr
ASTANA. KAZINFORM – Qazaqstanda kóktemgi sý tasqyny kezeńi jalpy baqylaýǵa alynǵan. Degenmen Aqmola, Soltústik Qazaqstan jáne Shyǵys Qazaqstan oblystarynda qaýip saqtalyp otyr. Bul týraly QR TJM Tótenshe jaǵdaılardyń aldyn alý komıteti tóraǵasynyń orynbasary Áset Jylqaıdarov málim etti.
Onyń aıtýynsha, tasqynnyń ýshyǵýyna jol bermeý úshin el kóleminde aldyn alý jáne jedel áreket etý sharalary júıeli túrde júzege asyrylyp jatyr.
– 1 naýryzdan bastap TJM men jergilikti atqarýshy organdardyń kúshimen respýblıka boıynsha 1,3 mln m³-ten astam erigen qar sýy soryldy. Sonymen qatar 89 myń qap tóselip, 103 myń tonna ınertti materıal paıdalanyldy. 1,8 myń shaqyrym aryqtar men kanaldar tazartylyp, 5,8 myń ýaqytsha bógen men úıindi salyndy. Nátıjesinde eldi mekenderden 9 mln m³-ten astam qar shyǵaryldy, - dedi ol.
Onyń málimetinshe, bul jumystar sý basý qaýpin tómendetýge baǵyttalǵan. Osyǵan oraı tasqynǵa qarsy qajetti qorlar da aldyn ala jasaqtalǵan. Qazirgi tańda 126 myń tonna janar-jaǵarmaı, 374 myń tonna ınertti materıal jáne 4,5 mln qap qory daıyn.
Sonymen birge jaǵdaıdy úzdiksiz baqylaý úshin áýeden monıtorıng júrgizilýde.
– Sý tasqyny jaǵdaıyn baǵalaý maqsatynda 16 óńirde 46 áýe baqylaý ushýy júzege asyrylyp, 332 eldi meken qamtyldy. Qazirgi ýaqytta áýeden baqylaý jalǵasyp jatyr, - dedi Áset Jylqaıdarov.
Onyń sózinshe, yqtımal qaýipterge jedel áreket etý úshin barlyq kúsh pen qural joǵary daıyndyqqa keltirilgen. Qazir sý tasqyny saldaryn joıýǵa azamattyq qorǵaý qyzmetteriniń 39 myńnan astam qyzmetkeri, 12 myń tehnıkasy, 4 myńnan astam sý sorǵysh quraly jáne 700 júzý quraly daıyn.
Sonymen qatar sý tasqyny kezeńi bastalǵaly beri, ıaǵnı 1 naýryzdan bastap, avtomobıl joldarynda 52 sý tasý jáne 9 joldy sý shaıý oqıǵasy tirkeldi. Qazirgi ýaqytta olardyń ishinde 9 sý tasý jáne 3 joldy sý shaıý jaǵdaıy baqylaýda tur.
Jalpy ahýaldy eskersek, qazirgi ýaqytta Aqmola, Soltústik Qazaqstan jáne Shyǵys Qazaqstan oblystaryndaǵy jaǵdaı baqylaýǵa alynǵan.
Aıta keteıik, buǵan deıin «Qazgıdromet» deregine sáıkes, eldiń birqatar óńirinde kúnniń jylynýy men jaýyn-shashynǵa baılanysty sý tasqyny men qar kóshkini qaýpi kúsheıgeni habarlandy.