Sý tasqyny men qýańshylyqty boljaý: Qazaqstan men Ońtústik Koreıa kelisim jasady
ALMATY. KAZINFORM — Qazaqstan men Ońtústik Koreıa sý sharýashylyǵyn tsıfrlandyrý salasynda birlese jumys isteıdi.
Sý resýrstary jáne ırrıgatsııa mınıstri Nurjan Nurjigitovtiń tapsyrmasy boıynsha «Qazsýshar» RMK Ońtústik Koreıanyń K-Water korporatsııasymen ózara túsinistik pen yntymaqtastyq týraly memorandým jasasty.
Qujatqa «Qazsýshar» RMK bas dırektory Anýar Óskenbaev jáne K-Water vıtse-prezıdenti Song En Han qol qoıdy. Memorandým birneshe baǵyttaǵy yntymaqtastyqty qamtıdy. Ol sý sharýashylyǵy nysandaryn tıimdi basqarý men monıtorıng júrgizýdi kózdeıdi.
Jasandy ıntellekt arqyly sý tasqyny men qýańshylyq táýekelderin boljaý jáne basqarý, sý resýrstaryn esepke alý men monıtorıngti tsıfrlandyrý josparlanǵan. Sondaı-aq gıdrotehnıkalyq qurylysjaılar men sýarý kanaldaryn basqarýda geoaqparattyq júıeler men kartografııalyq sheshimder qoldaný kózdelip otyr.
Sonymen qatar birlesken ǵylymı jáne tehnologııalyq zertteýler júrgizip, bilikti mamandar daıarlaý qarastyrylǵan. Kezdesýde K-Water ókilderi ózderiniń aqparattyq júıesin tanystyrdy.
Sý resýrstary jáne ırrıgatsııa mınıstrliginiń ókilderi men koreıalyq delegatsııa Qazaqstanda «Tsıfrlyq egiz» tehnologııasyn qoldaný múmkindigin talqylady. Bul tehnologııa naqty nysannyń nemese júıeniń vırtýaldy úlgisin quryp, sensorlardan, jasandy ıntellektten jáne sımýlıatsııalardan alynǵan derekter negizinde ony naqty ýaqyt rejıminde baqylaýǵa, taldaýǵa jáne basqarýǵa múmkindik beredi.
– Memleket basshysy Qazaqstan halqyna Joldaýynda sý sharýashylyǵy nysandaryn avtomattandyrý jáne jańǵyrtý mindetin qoıyp, sý salasynda jasandy ıntellektti engizýdiń mańyzyn atap ótti. K-Water kompanııasymen yntymaqtastyq elimizdegi sý sharýashylyǵyn tsıfrlandyrý qarqynyn jedeldetýge, ozyq halyqaralyq tájirıbeni ıgerýge jáne respýblıkada sý resýrstaryn tıimdi paıdalaný men basqarýdy arttyrýǵa jol ashady, – dedi Sý resýrstary jáne ırrıgatsııa vıtse-mınıstri Aslan Abdraımov.
Aıta keteıik, bıyl Sý resýrstary jáne ırrıgatsııa mınıstrligi Jetisý oblysyndaǵy Qyzylaǵash sý qoımasynyń rekonstrýktsııasyn aıaqtady. Naqtyraq aıtqanda, sý tasqyny úshin paıdalanylatyn sý jiberýge arnalǵan kanal nyǵaıtylyp, sý qabyldaıtyn jańa torap salyndy.