Sý tasqyny: Mańǵystaýdan Atyraýǵa arnaıy tehnıkalar jóneltildi
AQTAÝ. KAZINFORM – Mańǵystaý oblysynan Atyraý óńirinde sý tasqynynyń aldyn alýǵa kómek retinde arnaıy tehnıkalar jiberildi.
Oblys ákimdiginiń uıymdastyrýymen Atyraý qalasynda sý tasqynyna daıyndyq jumystaryn kúsheıtý maqsatynda Mańǵystaý óńirindegi birneshe kompanııa kómek retinde aýyr tehnıkalardy jiberdi.
Onyń ishinde «Alıans LTD» kompanııasy men «Qarajanbasmunaı» AQ, «Gatın» árqaısysy 1 ekskavator, 1 júk tıegish, «OńdasynStroı» – 1 ekskavator, «Aqtaý teńiz porty» – 2 júk tıegish, «AS-Qurylys» mekemesi 1 avtobýsty atalǵan óńirge jóneltti.
«Atyraýlyqtarǵa qoldaý kórsetý – bárimizdiń azamattyq mindetimiz. Kólikterdi basqaratyn jumysshylarymyzǵa da zor jaýapkershilik artylyp otyr. Bastysy – qaýipsizdik talaptaryn saqtap, qajetti kómek kórsetiletinine senemin», - dedi «Qarajanbasmunaı» AQ bas dırektory Marat Eleýsinov.
Atalǵan arnaıy tehnıkalar sý tasqynan zardap shekken jáne áli de qaýip tónip turǵan eldi mekenderge bóget salý jáne nyǵaıtý jumystaryna jumyldyrylady.
Osyǵan deıin Jańaózen qalasynan arnaıy tehnıkalardan quralǵan kómek brıgadasy Qulsaryǵa attanǵan bolatyn. Sondaı-aq Qulsarydan kóshirilgen turǵyndar Aqtaýda 17 nysanǵa ýaqytsha ornalasty.
