Sý tasqyny: Mal shyǵyny ótelip jatyr
ASTANA. KAZINFORM – Elimizde sý tasqynynyń beti qaıtyp, turǵyndardyń shyǵyny ótelip jatyr. Osy rette, zalaldy óteý jáne derekterdi salystyrý jónindegi komıssııalardyń jumysy sheńberinde sý tasqyny saldarynan 8,2 myń bas aýyl sharýashylyǵy janýarlarynyń ólgeni rastalyp otyr.
Onyń 70 paıyzǵa jýyǵy usaq mal. Aýyl sharýashylyǵy mınıstrliginiń respýblıkalyq epızootııaǵa qarsy jasaǵy oblys ákimdikterimen birlesip, ólgen janýarlardy jınaý jáne joıý jumystaryn jalǵastyryp jatyr. Bul týraly Ortalyq kommýnıkatsııalar alańynda ótken brıfıngte QR Aýyl sharýashylyǵy mınıstrliginiń resmı ókili Oljas Tilebaldın málimdedi.
Onyń aıtýynsha, ólgen janýarlardy ýtılızatsııalaý jumystary veterınarııalyq qyzmetterdiń erekshe baqylaýynda. Osy oraıda, shyǵý tegi kúmándi etti satý týraly taratylyp jatqan aqparat shyndyqqa janaspaıtynyn jetkizdi.
Sonymen qatar sý basqan aımaqtarda turaqty epızootııalyq jaǵdaıdy saqtaý maqsatynda Veterınarııalyq baqylaý jáne qadaǵalaý komıteti sý basqan aýmaqtardaǵy mal qorymdaryna qosymsha profılaktıkalyq dezınfektsııalyq óńdeý is-sharalaryn júrgizilip jatyr.
Respýblıkalyq shtabtyń hattamasymen ólgen janýarlardyń qunyn óteý algorıtmi bekitilgen. Ótemaqy alý úshin ótinish berýshiler zalaldy aktileý maqsatynda jergilikti komıssııaǵa júginýi qajet. Esterińizge sala keteıik, aýyl sharýashylyǵy maldary boıynsha ótemaqy mólsheri Ulttyq statıstıka bıýrosy jarııalaıtyn olardyń túrleri men jas toptary boıynsha naryqtyq quny týraly derekter negizinde anyqtalady.
«Óńirlerde ólgen janýarlardyń ıelerine ótemaqy tóleý júrgizilýde. Búginde Qostanaı oblysynda aýyl sharýashylyǵy janýarlarynyń 780 bas malyna 113,2 mln teńge, Aqtóbe oblysynda aýyl sharýashylyǵy janýarlarynyń 753 bas malyna 98,3 mln teńge somasynda ótemaqy tólendi. Qaraǵandy oblysynda aýyl sharýashylyǵy janýarlary boıynsha zalal tolyǵymen óteldi. Batys Qazaqstan oblysynda ótemaqyǵa 187,4 mln teńge bólindi, ótinimderdi qabyldaý rásimi júrgizilip jatyr. Tólem osy apta sońynda bastalady. Atyraý jáne Aqmola oblystarynda ótemaqy alýǵa ótinimder qabyldanýda», – dedi Oljas Tilebaldın.
Aýyl sharýashylyǵy janýarlarynyń ıelerine ótemaqy tóleý bıýdjet qarajatynan da, bıýdjetten tys kózderden de júrgiziletinin atap ótken jón.
