Sý tasqyny: Mahambet aýdanyndaǵy 5 aýylǵa áli de qaýip bar
ATYRAÝ. KAZINFORM – Atyraý oblysyndaǵy Mahambet aýdanynda sý tasqynynan shýraýa qojalyqtary zardap shekti. Osy aýdan aýmaǵymen ótetin Atyraý-Oral trassasynyń birneshe tusy jyryldy.
Mahambet aýdanynyń ákimi Qaırat Nurlybaevtyń aıtýynsha, qazir egistik alqabyn, ózge jer telimin sý basqan sharýa qojalyqtarynyń jetekshilerinen ótemaqy alý úshin ótinish qabyldaý bastalǵan.
«Jaıyq ózeniniń arnasynaa shyqqan sý tasqyny kezinde 100-ge jýyq sharýa qojalyǵy zardap shekti. Qazir arnaıy komıssııa qurylyp, jumysyn bastady. Sharýa qojalyqtarynan ótemaqy úshin ótinish qabyldanyp jatyr. Zańdylyqqa sáıkes, sharýashylyqtardyń sýda qalǵan jeri ábden qurǵaǵan soń tıisti zerdeleý, baǵalaý jumysy jalǵasady», - dedi Qaırat Nurlybaev.
Onyń aıtýynsha, Mahambet aýdanynda Jaıyq ózeniniń jaǵalaýyna ornalasqan 17 eldi meken bar. Eldi mekenderdi tasqyn sý baspaǵan. Sý tasqynynan qorǵaý maqsatynda 100 shaqyrymnan astam qorǵanys bógeti salyndy.
«Saraıshyq jáne Taldykól aýyldaryna sý basý qaýpi tónip, Atyraý-Oral trassasynyń 44-shi jáne 56-shaqyrymynyń tusy jyryldy. Qazir Saraıshyq aýyly tusyndaǵy trassanyń sý basqan ýchaskesin ýaqytsha qalpyna keltirý jumysy qolǵa alyndy. Máselen, 10 maýsymda «Qazavtojol» UK-nyń Atyraý oblystyq fılıaly joldy qalpyna keltirýdi bastady. Osy kezge deıin jolǵa úsh turba salyndy. Turbalardy kóbeıtip, joldy qosýǵa aǵystyń qattylyǵy sebep bolyp otyr. Óıtkeni, trassanyń 44-shaqyrymynda qatty aǵyspen tasqyn sý ótip jatyr. Soǵan qaramastan, joldyń bul bóligin qalpyna keltirý úshin qatty tastar men topyraq salý jumysy úzilissiz jalǵasa beredi. Joldy ýaqytsha qalpyna keltirý jumysyna tartylǵan adam, tehnıka sany jetkilikti», - dep málim etti Qaırat Nurlybaev.
Aýdan ákiminiń deregine súıensek, Jaıyq ózeniniń Mahambet aýdanyndaǵy bóliginde sý deńgeıi kún saıyn 2-3 santımetrge tómendep keledi.
«Qazir 4-5 aýylda áli de qaýip bar. Sol sebepten, Taldykól, Alǵa, Saraıshyq, Tańdaı, Eńbekshil aýyldarynda kezekshiler táýlik boıy jaǵdaıdy baqylaýǵa aldy. Aýyldardy tasqyn sýdan bóget qorǵap tur», - dedi Qaırat Nurlybaev.
Atyraý oblysynyń jedel shtabynan málim etkendeı, búgin, 13 maýsymda túsqaıta saǵat 16:00-de Mahambet aýdanynda Jaıyq ózenindegi sý deńgeıi 9 metr 77 santımetrdi quraǵan. Bul aýdanda qaýipti shek – 8 metr 50 santımetr. Demek, ózen sýy qaýipti shekten áli 1 metr 27 santımetrge artyq.
Eske sala ketelik, buǵan deıin Atyraýda Jaıyq ózeniniń jaǵalaýynan qum toltyrylǵan qapshyqtar alynyp jatqanyn habarlaǵan edik.
