Sý tasqyny: Qulsarynyń 1931 turǵyny ótemaqy aldy

ATYRAÝ. KAZINFORM – Atyraý oblysynyń Qulsary qalasyndaǵy sý tasqynynan zardap shekken 1931 turǵynnyń esepshotyna ótemaqy túsken. 

Atyraý oblysy jedel shtabynyń málimetinshe, Qulsary qalasynda 2500-den astam turǵyn baspanasyn qalpyna keltirý úshin ótemaqy alý týraly kelisimshartqa qol qoıǵan.

«Qazir 1931 turǵynnyń jeke shotyna aqsha aýdaryldy. Onyń ishinde 996 adam turǵyn úı satyp alý úshin, 935 turǵyn baspanasyna jóndeý júrgizý úshin qarjy aldy», - dep habarlady oblystyq jedel shtabtan.

Ótemaqy alǵan turǵyndardyń qatarynda Eskendir Іzmaǵanbetov te bar. Ol Qulsary qalasyndaǵy «Atyraý» shaǵyn aýdanynda turady.

«Biz úıimizde bir jyl turǵan edik. Tasqyn kezinde úıimiz sý astynda qaldy. Baspanamyz jańadan salynǵandyqtan, synaqty kóterý ońaı bolmady. Aýdandyq ákimdik úıimdi jóndeýge jumsalatyn shyǵyndy óteý úshin aqshalaı ótemaqy bóldi. Usynylǵan somaǵa kóńil tolǵandyqtan, kelisimshartqa qol qoıdyq. Úsh kúnnen keıin esepshotyma ótemaqy qarjysy tústi. Jaqynda búlingen úıimizdi jóndeýge kiristik», - deıdi Eskendir Іzmaǵanbetov.

Qazir Qulsaryda tasqyn sýdan zardap shekkenderge arnalǵan 100 úıdiń qurylysy júrip jatyr. Ár úıdiń aýdany – 100 sharshy metr. Turǵyn úılerdi salýǵa jergilikti 3 kompanııa tartylǵan.

Eske sala ketelik, buǵan deıin Qulsaryda tasqynnan zardap shekkender úshin 80 úı salýǵa 2,6 mlrd teńge bólingen.

Qazir jańa turǵyn úılerdiń qabyrǵasy qalanyp jatyr.