Sý tasqyny: Qulsaryda 60 qoı-eshkiniń óleksesi órteldi

ATYRAÝ. KAZINFORM – Atyraý oblysynyń Qulsary qalasynda sý tasqyny kezinde ólgen 60 qoı-eshkiniń óleksesi joıyldy.

Veterınarııalyq baqylaý jáne qadaǵalaý komıteti Jylyoı aýdandyq aýmaqtyq ınspektsııasynyń basshysy Jánibek Sabyrovtyń aıtýynsha, sý tasqynynyń saldarynan ólgen mal, ıt pen mysyq óleksesi jınalyp jatyr. 

«Jylyoı aýdandyq veterınarııa stansasy qyzmetkerleri Qulsary qalasynda sý tasqyny kezinde ólgen tórt túlik pen qustardyń óleksesin jınaýdy bastady. Qazir tólin qosa alǵanda 60 qoı-eshki, 8 úı qusy, 1 ıt pen 1 mysyqtyń óleksesi jınaldy. Ólekselerdi mal qorymdarynda jáne arnaıy belgilengen shuńqyrlarda órteý jolymen joıý jumystary júrgizilip jatyr»,-dedi Jánibek Sabyrov. 

Onyń aıtýyna qaraǵanda, ólekseler áli de tabylýy múmkin. Sol sebepten ólekselerdi jınaý, joıý jumysy áli de jalǵasady. 

Eske sala keteıik, sý basqan Qulsarydan bir adamnyń múrdesi tabylǵanyn jazǵan bolatynbyz.