Sý tasqyny: Qulsary qalasyna qaıyqpen shyǵyp, joǵalyp ketken er adam tabyldy

ATYRAÝ. KAZINFORM – Polıtsııa qyzmetkerleri bir kún buryn joǵalyp ketken 49 jastaǵy er adamdy tapty. 

Atyraý oblystyq polıtsııa departamenti baspasóz qyzmetiniń málimetinshe, er adamnyń joǵalǵany týraly 102 arnasyna habarlama kelgen. 

«Jylyoı aýdany polıtsııa bólimine 49 jastaǵy er adamnyń Qaraǵaı aýylynan Qulsary qalasyna qaıyqpen shyǵyp, bir kúnnen beri habar-osharsyz ketkeni týraly aqparat tústi. Polıtsııa qyzmetkerleri jedel izdestirý is-sharasyn júrgizýge áýe dronyn paıdalandy. Búgin, 11 sáýir kúni saǵat 11:00 shamasynda Qaraǵaı eldi mekeninen 10 shaqyrym qashyqtyqta sý tasqynynan paıda bolǵan araldan 49 jastaǵy er adam tabyldy. Qazir onyń jaǵdaıy birqalypty, týysqandarymen qaýyshty», - dep habarlady departamenttiń baspasóz qyzmeti.

Eske sala ketelik, budan buryn Qulsaryda qaraýsyz qalǵan úılerdi 110 polıtseı men 60 sarbaz qadaǵalap júrgenin jazǵan edik.