Sý tasqyny: Qostanaılyq kásipkerler 4 mlrd 600 mln teńge shyǵynǵa batty

ASTANA. KAZINFORM – Qostanaı oblysynda sý tasqynan zardarp shekken kásipkerlerdiń eshqaısysy nazardan tys qalmaıdy. Bul týraly «Biz birgemiz!» jalpyulttyq telemarafony barysynda Qostanaı oblystyq kásipkerlik basqarmasynyń ókili Talǵat Salamatov aıtty.

«Eshqandaı kásipker nazardan tys qalmaıdy. Erejege sáıkes, jyljıtyn, jyljymaıtyn múlik, qural-jabdyqtar jáne taýarlyq-materıaldyq qundylyqtar ótelýge jatady. Múliktiń zaqymdanǵany júrgizilgen baǵalaý negizinde rastalady. Al taýarlyq-materıaldyq qundylyqtar boıynsha memlekettik kirister organdarymen bıznestiń aınalymy jáne deklaratsııa derekterine sáıkes baǵalaý júrgizemiz», - dedi Talǵat Salamatov.

Jalpy, Qostanaı oblysynda 97 bıznes sýbektisi sý tasqynynan zardap shekkenderin aıtyp otyr. Olarǵa kelgen shyǵyn kólemi 4 mlrd 600 mln teńgeni quraıdy. 97 sýbektiniń basym bóligi saýda-sattyqpen aınalysatyn shaǵyn jáne orta bıznes ókilderi. 2 orta jáne iri bıznes sýbektisi bar. Negizinen Qostanaı qalasy men Qostanaı aýdany kásipkerleri qatty zardap shekken.

Aıta keteıik, 10 respýblıkalyq arnanyń tikeleı efırinde jalpyulttyq telemarafon ótip jatyr. 

Jibek Joly, Qazaqstan, «Habar», «Eýrazııa», «KTK», «31 arna», Atameken Business, Astana TV, «7 arna» jáne Almaty TV telearnalarynyń 5 saǵattyq tikeleı efırinde tasqyn basqan aýmaqty kózben kórgen, tabıǵı apattan zardap shekken turǵyndardyń jan tebirenter oqıǵalary aıtylyp, tabıǵı apat aımaqtarynan reportajdar berilýde.