Sý tasqyny: Qostanaı oblysynda 1 myń otbasyǵa áleýmettik tólem berildi
ASTANA. KAZINFORM – Qostanaı oblysynda qyrylǵan maldyń shyǵynyn óteý jumystary júrip jatyr. Bul týraly Qostanaı oblysy ákimdiginiń jumyldyrý daıyndyǵy, aýmaqtyq qorǵanys jáne azamattyq qorǵaý basqarmasynyń basshysy Dıas Kabdýshev aıtty.
«Buǵan deıin oblystyń eki qalasynda jáne 4 aýdanynda tótenshe jaǵdaı jarııalandy. Atalǵan jerlerde zardap shekkenderge zalaldy óteý boıynsha komıssııalar qurylyp, jumys istep jatyr. Tólem týraly sheshimderdi komıssııalar jyljymaıtyn ári jyljymaly múlik pen maldy esepteýden keıin qabyldaıtynyn atap ótken jón», - dedi D. Kabdýshev Ortalyq kommýnıkatsııalar qyzmetindegi baspasóz máslıhatynda.
Onyń aıtýynsha, oblystaǵy 3 negizgi sý qoımasyndaǵy jaǵdaı shtattyq rejımde.
«Óńirde 51 jeke turǵyn úıdi sý basyp tur. 9 114 adam qaýipsiz jerge kóshilirgen edi. Qazir 189 adam ýaqytsha ornalastyrý ortalyqtarynda ornalasqan, qalǵandary týystarynyń úıinde. Keltirilgen shyǵyndy esepteý jáne barlyq zardap shekkenderge kómek jónindegi komıssııalardyń jumysy jalǵasyp jatyr.
Mal shyǵyny úshin ótemaqy tólenip jatyr. Veterınarııalyq qyzmettiń málimetinshe, ólgen 214 bas mal úshin tólem jasalǵan. Qazir 1051 otbasyna 200 mln teńge somasynda áleýmettik kómek jasaldy», - dedi basqarma basshysy.
