Sý tasqyny: Kókshetaýda qutqarý jumystary qalaı júrgizilip jatyr
KÓKShETAÝ. KAZINFORM – Kókshetaýda úılerin sý basqan turǵyndardy qutqarý jumystary jalǵasyp jatyr.
28 naýryzda tańerteń Kókshetaý qalasynda Qylshaqty ózeni arnasynan asyp, buryn-sońdy bolmaǵan sý tasqyny boldy. Aǵyn sý vokzaly mańy aýdanyndaǵy kópqabatty úılerdiń aýlalaryn, jeke sektordy, kóshelerdi, áleýmettik nysandar men ınjenerlik kommýnıkatsııa nysandaryn basyp qaldy. Osyǵan baılanysty qalalyq №12 orta mekteptiń mańyndaǵy jáne Abaı kóshesiniń tusyndaǵy Qylshaqty ózeni arqyly ótetin kópirler jabyldy, kólik qozǵalysy shekteldi. Alaıda muz aralas aǵyn sý qalalyq №12 orta mekteptiń mańyndaǵy kópirdi shaıyp ketti.
Kólik qatynasy qıyndap, turǵyndar úılerinen shyǵa almaı, shyqqany jete almaı qınaldy. Kesheden beri jergilikti atqarýshy organdar men qutqarýshylar turǵyndardy qaıyqpen jáne jaıaý arqalap evakýatsııalap jatyr.
«Tańerteń úıimizdiń kireberisi sýǵa tolyp ketti. Syrtqa shyǵý múmkin bolmady. Qutqarýshylar qaıyqtyń kómegimen sýy joq jerge alyp shyqty.», - deıdi Gaýhar esimdi qala turǵyny.
Sý tasqynynan jeke sektordyń turǵyndary qatty japa shekti. Úı ishindegi turmystyq tehnıkanyń barlyǵy sýda qalǵan.
«Sanaýly mınýttardyń ishinde úıdiń jertólesi sýǵa tolyp, edenniń ústine shyqty. Turmystyq tehnıkany bıik kóterip úlgere almadyq. Qujattarymyzdy alyp, syrtqa júgirdik. Kórshilerimizdiń úılerin de sý basty», - dep ókinishin bildirdi Jandildınov kóshesindegi №20 úı turǵyny Lıýbov Pomarkova.
Dál osyndaı jaǵdaıdy qala turǵyny Syrym Rústemuly da bastan keshken.
«Úıime sý kirgen kezde jumysta boldym. Kórshilerim habarlap aıtty. Dúnıe-múliktiń barlyǵy sýǵa ketti», - dep kúrsinedi turǵyn.
Kókshetaýlyqtar qıyn sátte kómekke kelgen qutqarýshylar men kommýnaldyq qyzmetterge alǵys bildirip jatyr.
«Mundaı jaǵdaı birinshi ret basymyzdan ótip otyr. Buǵan deıin sý tasqyny boldy, biraq mundaı emes. Kommýnaldyq qyzmetter men qutqarýshylar bolmaǵanda jaǵdaı budan da kúrdelene túser me edi. Der kezinde kómekke kelgen qutqarýshylar men kommýnaldyq qyzmet jumysshylaryna alǵysym sheksiz», - dep rızashylyǵyn bildirdi Anastasııa Popova.
Qazirgi tańda Kókshetaý qalasynda úılerin sý basqan turǵyndardy evakýatsııalaý jumystary jalǵasyp jatyr. Sońǵy málimetter boıynsha 113 adam evakýatsııalandy, onyń 30-y – bala. Kókshetaý qalasynyń «Jumyspen qamtý jáne áleýmettik baǵdarlamalar bólimi» memlekettik mekemesiniń beıimdeý ortalyǵyna 50-den astam adam ornalastyryldy.
Qylshaqty ózeniniń arnasynan asýynan 16 jeke úı, 29 jeke aýla aýmaǵy jáne 12 kóp qabatty turǵyn úı aýlasy, sondaı-aq «Ertóstik» balabaqshasynyń 1 qabatyna sý kirgen. Qazirgi kezde sý sorý jumystary júrip jatyr. Qala turǵyndarynyń qaýipsizdigin qamtamasyz etý úshin sý tasqynymen kúres úzilissiz júrgiziledi.
Aıta ketsek, budan buryn Kókshetaýda sý tasqynyna baılanysty tótenshe jaǵdaı jarııalanǵanyn jazǵan edik.
