Sý tasqyny kezindegi sýdyń sapasy: qaýip pen aldyn alý sharalary
ASTANA. KAZINFORM — Sý tasqyny – bul ózender men toǵandardaǵy sý deńgeıiniń kóterilýi saldarynan úlken aýmaqtardyń sý astynda qalýyna ákeletin tabıǵı qubylys. Mundaı jaǵdaılar ásirese kóktemde jıi kezdesedi jáne turǵyndarǵa, ásirese jeke sektorda turatyndar úshin úlken qaýip tóndiredi.
Astana qalasynyń sanıtarııalyq-epıdemıologııalyq baqylaý departamenti basshysynyń orynbasary Muqamǵalı Aryspaev sý tasqyny kezinde qarapaıym gıgıenalyq erejelerdi saqtaý arqyly juqpaly aýrýlardyń aldyn alýǵa bolatynyn aıtty.
Sý tasqyny — ózenderdegi, toǵandardaǵy jáne basqa da sý aǵyndaryndaǵy sý deńgeıiniń únemi qaıtalanyp kóterilýi, úlken aýmaqtardy sý basýmen jáne jer asty sýlary deńgeıiniń kóterilýimen birge júretin jaǵdaı.
— Sý deńgeıiniń tez kóterilýi jáne aınalany sý basý halyqqa úlken qaýip tóndiredi. Ózenderdiń, shaǵyn kólderdiń sýy tasyǵan kezde, olar jańbyr sýymen aralasyp erigen sý paıda bolady, bul qudyqtar men uńǵymalardaǵy sýdyń qoqys, sharýashylyq aýlalary, dárethanalardyń aǵyndy sýlarymen jappaı lastanýyna alyp keledi, — dedi ol.
Sý tasqynynyń saldarynan ortalyqtandyrylǵan jáne ortalyqtandyrylmaǵan sýmen jabdyqtaý kózderinen aýyz sýdyń lastanýy, sý tasymaldaý arqyly halyq arasynda juqpaly aýrýlardyń paıda bolýy qaýpi týyndaıdy.
— Sý arqyly gepatıt, tyrysqaq, ish súzegi, paratıf, dızenterııa, týlıaremııa (kemirgishterdiń sekretsııasymen aýyz sýdyń lastanýy) juǵady. Sý arqyly beriletin vırýstyq aýrýlardyń ishinde ishek vırýstary, sonyń ishinde enterovırýstar, gepatıt-A jáne basqalary basym bolady, — dedi Muqamǵalı Aryspaev.
Kóktemgi sý tasqynyna daıyndyq qala ómiriniń mańyzdy máseleleriniń biri.
Astana qalasynyń sanıtarııalyq-epıdemıologııalyq baqylaý departamenti kóktemgi sý tasqyny kezeńinde sý qubyry-káriz júıelerin paıdalanýǵa jáne aýyz sý sapasyna baılanysty sanıtarııalyq-epıdemıologııalyq jaǵdaıdyń nasharlaýyn boldyrmaý maqsatynda turǵyndarǵa sý tasqyny kezeńinde aýrýdyń aldyn alýdyń qarapaıym jáne tıimdi sharalaryn saqtaý qajettigin eske salady:
- turǵyn úılerdiń jáne basqa da obektilerdiń aýlasyn qardan, jınalǵan qoqystan ýaqtyly tazalaý;
- dárethanalar men qoǵamdyq ashyq dárethanalardy tazalaý jáne olardy ýaqytyly dezınfektsııalaý;
- sharýashylyq qurylystar men jertólelerdi sý basýǵa jol bermeý;
- aýlada drenajdy aryqtar jasaý;
- eldi mekenge jaqyn mańdaǵy ózender men aryqtardy qoqys pen muzdan tazartý júrgizý;
- qudyqtardy qaqpaqtarmen jabdyqtaý, aǵash úılerdi jaqsy jóndeýden ótkizý.
- uńǵymalar jaramsyz bolyp, sý qubyry jumys istemeı qalý jaǵdaıyn eskere otyryp, aýyz sýdyń jetkilikti mólsherin jınaqtaý;
- jeke gıgıenany saqtaý, ishý úshin tek qaınatylǵan nemese bótelkedegi sýdy paıdalaný.
- erigen (tasqyn) sýmen lastanǵan tamaq ónimderin jeýge bolmaıdy;
- sapasy kúmándi qudyqtardyń sýyn nemese aǵyndy sýdy tıisti zerthanalyq tekserýsiz aýyz sý úshin paıdalanýǵa bolmaıdy;
- aýyz sýy bar qudyqtardy lastanǵan sýdan tazalaý.