Sý tasqynynan óńirlerde 8,1 myń mal qyryldy
ASTANA. KAZINFORM – Sý tasqyny kezinde elimiz aýmaǵynda 88 myń mal qaýipsiz aýmaqqa shyǵaryldy. Bul týraly Aýyl sharýashylyǵy mınıstrliginiń resmı ókili Oljas Tilebaldın aıtty.
«Sý tasqyny kezindegi shyǵyndy barynsha azaıtý boıynsha qabyldanǵan sharalardyń nátıjesinde Aýyl sharýashylyǵy mınıstrliginiń oblys ákimdikterimen birlesken áreketi arqyly 88 myńnan astam bas mal qaýipsiz aýmaqqa shyǵaryldy. Jedel derekter boıynsha ólgen mal sany - 8,1 myń. Onyń ishinde usaq mal – 6 myń, iri qara – 1,5 myń, jylqy – 514. Respýblıkalyq epızootııaǵa qarsy otrıad mal ólekselerin joıý jumystaryn jalǵastyryp jatyr», - dedi O. Tilebaldın Ortalyq kommýnıkatsııalar qyzmetindegi brıfıngide.
Onyń aıtýynsha, qazir 4,1 myń maldyń óleksesi joıyldy. Premer-Mınıstrdiń tapsyrmasy boıynsha bul jumys kúsheıtilgen rejımde jalǵasady. Sý tasqynyna qarsy is-sharalardy úılestirý jáne sý tasqyny sadaryn joıý jónindegi respýblıkalyq shtab ólgen mal ıelerine ótemaqy tóleý algorıtmin bekitti. Mal ıelerin anyqtaý, kelgen shyǵyndy esepteý jáne basqa da máselelerdi sheshý úshin óńirlerde jergilikti atqarýshy organdar shyǵyndy anyqtaý jónindegi komıssııalardy qurdy. Mal ıeleri tıisti málimetterdi kórsete otyryp, jergilikti komıssııaǵa ótinish berýi kerek. Qyrylǵan mal bal basyna menshik quqyǵy komıssııalardyń aktilerimen rastalady.
«Jalpy, sý tasqynynan zardap shekken aımaqtardaǵy epızootııalyq jaǵdaı, sondaı-aq mal ıelerine kelgen shyǵyndy óteý máseleleri Qazaqstan Respýblıkasy Aýyl sharýashylyǵy mınıstrliginiń turaqty baqylaýynda», - dedi resmı ókil.
Budan buryn habarlanǵandaı, jaqynda sý tasqynynan qyrylǵan mal ótemaqysyn tóleýdiń algorıtmi ázirlendi.
