Sý tasqyny kezinde qutqarýshylar qansha eńbekaqy aldy

ASTANA. KAZINFORM – Sý tasqyny kezinde TJ mınıstrligi qutqarýshylarynyń ortasha jalaqysy 334 myń teńgeni qurady. Bul týraly sala mınıstri Shyńǵys Árinov aıtyp berdi. 

Mınıstrdiń aıtýynsha, buǵan deıin TJM jedel-qutqarý bólimsheleriniń qyzmetkerlerine ústemeaqy qarastyrylǵan:

– Kútý rejıminde bolǵany úshin jáne attanýǵa turaqty daıyndyǵy úshin – 25% ; 

– Densaýlyq pen ómirge zııan keltirý qaýip-qaterimen baılanysty jumys úshin – 70% ;

– Ómirge qaýip tóndiretin tótenshe jaǵdaılarda jumys istegen árbir saǵat úshin – 300% ; 

– Joǵary jáne tómen temperatýrada jumys istegen árbir saǵat úshin – 100% ; 

– Sý astynda apattyq-qutqarý jumystaryn júrgizgeni úshin – 100% ; 

– Qaza tapqandardyń denelerimen jumys isteýge baılanysty psıhoemotsıonaldy júkteme úshin – 100% ; 

– Shybyn-shirkeı jáne basqa da qaýipti jándikterdiń taralý aımaqtarynda jumys istegeni úshin – 15%.

«Eger olar osy jiktemege saı kelse, sáıkesinshe qosymsha aqy tólenedi. Osylaısha aı saıyn olar ártúrli jalaqy alyp keledi. Biz jaqyn arada qandaı oqıǵalar bolatynyn boljaı almaımyz. Sý tasqyny kezinde qosymsha aqyny esepke alǵanda, ortasha jalaqy 334 myń teńgeni qurady», - dep jaýap berdi Shyńǵys Árinov.