Sý tasqyny kezinde kásibi zardap shekken keıbir aqtóbeliktiń qujaty túgel emes

AQTÓBE. KAZINFORM – Aqtóbede sý tasqyny kezinde zardap shekken bıznes nysanynyń sany azaıdy. Sebebi keıbir kásipkerdiń qujaty túgel emes. 

Aqtóbe oblysy boıynsha buǵan deıin 76 kásipkerdiń shyǵynyn óteý týraly aıtyldy. 

Qazirgi kezde onyń sany – 67.

– Birinshiden, sý tasqyny kezinde jumys istep turǵan kásip bolýy tıis. Keıbiri salyq organdarynda jeke kásipker retindegi tirkeý qujatyn toqtatqan. Sondaı eki kásipker bar. Ekinshiden, qujaty túgel emes. Aýylda dúken bar, biraq qujatta jerin ǵana rásimdep, qurylysy kórsetilmegen. Bul kóbinde kezdesetin másele, - dedi Aqtóbe oblystyq Kásipkerlik basqarmasynyń basshysy Almas Salyqbaev. 

Aqtóbe oblysyndaǵy 67 kásipkerlik sýbektisiniń 33-ine 380 mln teńgeden astam qarjy bólinedi. Qazirgi kezde olardyń ótinishin aımaqtyq komıssııa maquldady. Shilde aıynda 7 kásipkerge 120 mln teńge aýdaryldy. Al qalǵan 26 kásipkerlik sýbektisiniń shyǵynyn esepteý úshin baǵalaý komıssııasy jumys istep jatyr. 

– Bizde qazir 4 kásipker ótinish bermedi. Olar jyl sońyna deıin ýaqyt bar dep júr. Sý tasqyny kezinde múlki búlingender arasynda dúken, tehnıkalyq qyzmet kórsetý ortalyqtary, monsha, tsehtar bar. Barlyq shyǵyn úshin respýblıkalyq bıýdjetten 733,5 mln teńge qarastyryldy, - dedi Almas Salyqbaev.