Sý tasqyny kezeńine daıyndyq: óńirlerde qandaı sharalar atqarylyp jatyr
ASTANA. KAZINFORM – Jambyl jáne Batys Qazaqstan oblystary sý basý qaýpin azaıtý men eldi mekenderdi qorǵaý boıynsha ınjenerlik jáne profılaktıkalyq is-sharalar keshenin iske asyra otyryp, sý tasqyny qaýipti kezeńge belsendi daıyndalýda.
Jambyl oblysynda Tótenshe jaǵdaılar departamentiniń qyzmetkerleri kólbeý aǵyndar men tasqyn sýlarǵa beıim yqtımal qaýipti ýchaskelerdi tekserdi. Sý burý ınfraqurylymynyń jaı-kúıi baǵalanyp, yqtımal sý basý aımaqtary anyqtaldy. Nátıjesinde betkeılerdi nyǵaıtý, drenajdyq júıelerdi jańǵyrtý jáne halyq arasynda túsindirý jumystaryn júrgizý usynyldy.
Batys Qazaqstan oblysynda ótken jyldardaǵy tájirıbe eskerilip, 2025 jylǵa arnalǵan ınjenerlik jumystar jospary iske asyrylýda. Oral, Shaǵan jáne Derkól ózenderiniń boıynda 10 shaqyrym qorǵanysh bógenderi salyndy. Oral qalasynda ózen jaǵasyn nyǵaıtý aıaqtalyp, Qaratóbe aýdanynda Qaldyǵaıty men Jaqsybaı ózenderiniń arnalary tazartyldy. Tasqala aýylynda erigen sýdyń negizgi kólemin qabyldaıtyn aryq kanaldary retteldi.
- Jyl sońyna deıin oblysta sý tasqynyna qarsy qorǵaý boıynsha taǵy 17 jobany aıaqtaý josparlanyp otyr. Jalpy jospar 35 is-sharany qamtıdy, onyń 13-i tolyq júzege asyrylǵan, qalǵandary jalǵasýda. Erekshe nazar eldi mekenderdegi aryq júıelerin salý men qaıta jańǵyrtýǵa, sondaı-aq joldardaǵy sý ótkizý qubyrlarynyń ótkizý qabiletin arttyrýǵa aýdarylyp otyr, - delingen TJM dereginde.
Bul sharalar sý tasqyny qaýpin aıtarlyqtaı tómendetip, kóktemgi kezeńde turǵyndardyń qaýipsizdigin qamtamasyz etýge múmkindik beredi.
Aıta keteıik, Pavlodarda da 2026 jylǵy sý tasqynyna qarsy is-sharalar qazirden bastalyp ketti.