Sý tasqyny kezeńine daıyndyq: elimizde 69 gıdrotehnıkalyq nysan jóndelip jatyr

ASTANA. KAZINFORM – Ortalyq kommýnıkatsııalar qyzmetiniń alańynda Sý resýrstary jáne ırrıgatsııa mınıstrligi Sý resýrstaryn retteý, qorǵaý jáne paıdalaný komıtetiniń tóraǵasy Seıilbek Nurymbetov sý nysandaryn qorǵaý sharalary, zańsyz sý alý faktilerimen kúres nátıjeleri jáne sý tasqynyna qarsy is-sharalar jóninde aıtty.

Aldaǵy sý tasqyny kezeńine daıyndyq sheńberinde komıtettiń basseındik sý ınspektsııalary gıdrotehnıkalyq nysan ıelerine sý tasqynyn qaýipsiz ótkizý úshin qajetti is-sharalardy júrgizý boıynsha usynystar berip jatyr. Buǵan rekonstrýktsııa, jóndeý jumystary jáne qurylys-montaj jumystaryna arnalǵan jobalyq-smetalyq qujat ázirleý de kiredi.

Mınıstrlik málimetinshe, qazirgi ýaqytta 69 gıdrotehnıkalyq nysanda menshik ıeleri rekonstrýktsııa, kúrdeli jáne aǵymdaǵy jóndeý jumystaryn júrgizip jatyr. Abaı oblysyndaǵy Shar sý qoımasynda jáne Shymkent qalasyndaǵy Aqjar sý qoımasynda kúrdeli jóndeý aıaqtaldy. Aqtóbe, Jambyl jáne Batys Qazaqstan oblystarynda 24 nysan jóndeldi. Kúrdeli klımattyq jaǵdaılarǵa qaramastan, 2025 jylǵy vegetatsııa kezeńiniń qorytyndysy kórsetkendeı, el boıynsha jalpy 1,2 mln gektar egistik alqap sýarylyp, sý alý kólemi 11 mlrd tekshe metrden asty. Bul kólemniń 98%-y Almaty, Jambyl, Qyzylorda, Túrkistan jáne Jetisý oblystaryna tıesili.

Qazirgi ýaqytta elimizdiń ońtústigindegi sý qoımalary sý jınaý rejıminde jumys istep tur. Jyl basynan beri sýdyń «qara naryǵymen» kúres maqsatynda basseındik sý ınspektsııalary 463 tekseris júrgizip, onyń nátıjesinde zańbuzýshylyqty joıý boıynsha 143 nusqama berildi. Sondaı-aq 801 ákimshilik aıyppul salyndy. Onyń ishinde 346-sy óz betimen sý paıdalanǵany úshin.

Jańa Sý kodeksin iske asyrý maqsatynda komıtet 22 normatıvtik-quqyqtyq akt ázirledi. Jergilikti atqarýshy organdarmen birlesip, eldi mekenderdiń aýmaǵyndaǵy sý qorǵaý aımaqtary men beldeýlerin belgileý jónindegi is-sharalar jospary bekitildi. Qazirgi tańda basseın ınspektsııalary men ákimdikter sý qorǵaý aımaqtary men beldeýleri belgilenýi qajet jerústi sý nysandarynyń tizimin jasap jatyr. Tıisti jobalardy ázirleý bastaldy.

Budan bólek, 2025-2027 jyldarǵa arnalǵan eldi mekenderge jaqyn ornalasqan ózenderdiń sý tasqyny qaýpi joǵary ýchaskelerin qalpyna keltirý boıynsha is-sharalar jospary ázirlenip, bekitildi. Tazalaý jáne tereńdetý úshin Qazaqstannyń on oblysynda jalpy uzyndyǵy 815 shaqyrym bolatyn 51 ózen men bir kóldiń ýchaskeleri aıqyndaldy.

Komıtet memlekettik sý kadastryn ázirlep, jarııa etti. «Sý resýrstarynyń aqparattyq-taldaý ortalyǵy» KEAQ-men birlesip Sý resýrstarynyń ulttyq aqparattyq júıesiniń esepterin toltyrý jáne qalyptastyrý boıynsha jumys júrgizilip jatyr.

- Basseındik sý ınspektsııalarynyń materıaldyq-tehnıkalyq bazasy jaqsartyldy. Arnaıy tehnıka men avtokólik parki jańartyldy. Mınıstrlik pen Germanııanyń halyqaralyq yntymaqtastyq qoǵamy arasyndaǵy kelisim aıasynda jańa kompıýterlik tehnıka alyndy. On ákimshilik ǵımaratta jóndeý jumystary júrgizildi. Bul atqarylǵan sharalar ınspektsııalardyń tıimdi jumys isteýi men olardyń fýnktsııalaryn sapaly oryndaýyna qajetti jaǵdaı jasady, – dedi Sý resýrstaryn retteý, qorǵaý jáne paıdalaný komıtetiniń tóraǵasy Seıilbek Nurymbetov.

Aıta keteıik, SQO-da sý tasqynynan qorǵaıtyn bógetter qaıta jańartylyp jatyr.

2026 jyly 109 shaqyrym ózen arnasy kúsheıtiledi.