Sý tasqyny kezeńinde tótenshe jaǵdaı bolǵan joq - Sý resýrstary mınıstrligi
ASTANA. KAZINFORM – Bıylǵy kóktemgi sý tasqyny kezeńi elimizde apatsyz ótip, bógetter men sý sharýashylyǵy nysandarynda tótenshe jaǵdaı tirkelgen joq. Bul týraly Ortalyq kommýnıkatsııalar qyzmetinde ótken brıfıngte Sý resýrstaryn retteý, qorǵaý jáne paıdalaný komıtetiniń tóraǵasy Seıilbek Nurymbetov málimdedi.
Onyń aıtýynsha, sýarý maýsymyna daıyndyq pen kóktemgi tasqyn kezinde sý resýrstaryn tıimdi retteýge baǵyttalǵan keshendi jumystar júrgizilgen. Sonyń nátıjesinde eldegi sý qoımalary josparlanǵan deńgeıge deıin tolyp, tasqyn kezeńi shtattyq rejımde ótken.
Sonymen qatar erigen qar sýynyń edáýir bóligi sý jınalatyn alqaptar men kól júıelerine ekologııalyq maqsatta jiberildi. Bul birneshe óńirdegi ekologııalyq ahýaldy turaqtandyrýǵa múmkindik bergen.
– Máselen, Tasótkel sý qoımasynan Túrkistan oblysynyń Sozaq aýdanyna 1 mlrd tekshe metrden astam sý jiberildi. Al Ertis basseıninde 9 sáýir men 5 mamyr aralyǵynda jaıylma shalǵyndardy sýlandyrý úshin 6,4 mlrd tekshe metr sý baǵyttaldy. Qazir Pavlodar oblysynda Ertis ózeniniń jaıylmasynda sý basqan aýmaq kólemi 297 myń gektardan asyp, jalpy aýmaqtyń 88 paıyzyna jetti, – dedi komıtet tóraǵasy.
Budan bólek, Balqash kólin tolyqtyrý jumystary jalǵasyp jatyr. Osy maqsatta 2025 jylǵy qazannan bıylǵy sáýirge deıin Qapshaǵaı sý qoımasynan 3,7 mlrd tekshe metr sý jiberilgen. Sonyń nátıjesinde Balqash kólindegi sý deńgeıi 29 santımetrge kóterildi.
Aıta keteıik, buǵan deıin sý únemdeý máselesiniń ózektiligi jáne ony sheshý joldary týraly jazǵan edik.
