Sý tasqyny kezeńi taıap qaldy, aqsaqaldardan keńes suraý kerek - Aqtóbe ákimi
AQTÓBE. KAZINFORM – Aqtóbede sý basý qaýpi bar 36 eldimeken bar. Qazirgi kezde onyń altaýy respýblıkalyq mańyzy bar tasjolǵa jaqyn. Óńir basshysy Ashat Shaharov kóktemgi sý tasqyny kezeńinde jergilikti turǵyndardyń, aqsaqaldardyń sózine den qoıýdy tapsyrdy.
Aqtóbe oblysy ákimi baspasóz qyzmetiniń habarlaýynsha, tótenshe jáne tehnogendi jaǵdaıdyń aldyn alý úshin jıyn ótip, onda sý tasqyny kezeńindegi alǵysharttar pysyqtaldy. Aqtóbe oblystyq Tótenshe jaǵdaılar departamentiniń bastyǵy Nurǵalı Júnisovtiń aıtýynsha, 21-27 aqpan aralyǵynda Oıyl, Qobda, Mártók, Baıǵanın, Temir, Muǵaljar, Alǵa jáne Qarǵaly aýdandarynyń sý tasqyny qaýpi bar ýchaskelerine zerdeleý jumystary júrgizilgen.
- Eldimekenderdi sý tasqyny qaýpinen qorǵaý maqsatynda aýdan ákimdikteri janar-jaǵarmaı, ınertti materıaldar, qapshyq jáne azyq-túlik qory, ýaqytsha ornalastyrý pýnkterin ázirledi. Qar shyǵarý, aryqtar men arnalardy, sý ótkizý qurylǵylaryn tazartý jumystary júrgizilip jatyr. Sonymen birge qorǵanys bógetteri kóterildi,- dep atap ótti Aqtóbe oblystyq Tótenshe jaǵdaılar departamentiniń bastyǵy Nurǵalı Júnisov.
Eske salsaq, sý tasqyny kezeńine daıyndyq aıasynda ózenderde 9 shaqyrymdyq jaǵalaý nyǵaıtylyp, keıbir tusy tereńdetildi. Sonymen birge 5 gıdrotehnıkalyq qurylysqa jóndeý júrgizildi. Avtomobıl joldary boıyna 23 sý ótkizý qubyry salyndy jáne 3,5 shaqyrym jol men 4 kópir jóndeldi. Ashat Shaharov sý tasqyny kezeńi onyń qatań baqylaýynda ekenin aıtty.
- Sý tasqyny kezeńi taıap qaldy, qazir bosańsıtyn ýaqyt emes. Kabınette otyrmaı, aýyl men aýlany bir aı boıy aralap, jaǵdaıdy kózben kórip, jumys isteńizder. Aýa raıynyń qolaısyzdyǵyna biz qaı kezde de daıyn bolýymyz shart. Sý tasqyny – jyl saıyn qaıtalanatyn qubylys. Bárińizdiń de tájirıbelerińiz bar. Jergilikti jerde belsendiler, kópti kórgen úlkendermen aqyldasyp, keńes surańyzdar. Olar máseleni burynnan biledi, qaı jerdi sý basý qaýpi bar ekeninen habardar. Ár aýdan jáne qalada jumys istep jatqan Tótenshe jaǵdaılar departamentiniń mamandarynyń da keńesine nazar aýdarý kerek. «Qazgıdromet» aldyn ala aýa raıynyń qandaı bolatynyn aıtyp otyrady, - dedi aımaq basshysy Ashat Shaharov.
