Sý tasqyny kezeńi: Qazaqstan Reseı jáne Qytaıdan aqparat alyp otyrady

ASTANA. KAZINFORM - Cý tasqyny kezeńinde Qazaqstan kórshiles Reseı jáne Qytaı elderimen ózara aqparat almasyp otyrady. Bul týraly Kazinform saýalyna Sý resýrstary jáne ırrıgatsııa mınıstrliginiń resmı jaýabynda aıtyldy.

— Qazaqstan negizgi transshekaralyq ózenderdiń (Ertis, Іle, Shý, Talas, Syrdarııa, Jaıyq) tómengi aǵysynda ornalasqan el retinde sýmen qamtamasyz etý máselelerinde kórshi elderge táýeldi. Sondyqtan kórshi eldermen ózara tıimdi yntymaqtastyqty damytý negizgi faktor bolyp tabylady. Búgingi kúni transshekaralyq ózender salasyndaǵy barlyq irgeles eldermen jumys istep turǵan birlesken komıssııalar men jumys toptary sheńberinde sý dıplomatııasy jalǵasýda, - delingen habarlamada.

Sondaı-aq vedomstvo qazirgi kezde Reseı jáne Qytaı elderimen sý tasqyny kezindegi is-áreket kelisilgenin aıtady.

— Sý dıplomatııasy sý tasqyny kezinde de, sýarý maýsymy kezinde de mańyzdy. Qazir ol joǵary deńgeıde dep aıta alamyz jáne kórshi eldermen kelissózder boıynsha qıyndyqtar joq. Sý tasqyny kezeńin ótkizý boıynsha ózara is-qımyl jónindegi Qazaqstan-Reseı birlesken jumys toby quryldy. Qazir jumys tobynyń quramy, erejesi jáne 2025 jylǵa arnalǵan jumys jospary bekitildi. Qazaqstan men Reseı sý tasqyny kezeńinde aqparat almasýǵa kelisti. Qytaımen de sý tasqyny kezindegi jumys eki jaqty kelisim arqyly júzege asady, - delingen jaýapta.

Odan bólek Qyrǵyzstan sý tasqyny kezeńinde Talas ózeni arqyly sý berý kólemi ulǵaıtatynyn málimdegen bolatyn. Bul shara Kırov sý qoımasynan sý jiberýdi retteý jáne sý tasqyny kezeńinde apattyń aldyn alý maqsatynda jasalady.

BUU-nyń málimetinshe, álem halqynyń 40 protsenti transshekaralyq ózen-kólderdiń mańyna qonystanǵan, onyń tek besten bir bóliginde ǵana sý resýrsyn birlese paıdalaný boıynsha kelisim bar.

Osy oraıda Ortalyq Azııada transshekaralyq ózender máselesi qalaı sheshilip jatqany týraly kólemdi materıal jarııalaǵan edik.