Sý tasqyny: «QazMunaıGaz» áleýmettik nysandardy qalpyna keltirý jumystaryna qarjylaı kómek kórsetedi
ASTANA. KAZINFORM - Memleket basshysynyń tapsyrmasyna sáıkes «QazMunaıGaz» UK AQ óz qyzmetin júrgizetin óńirlerdegi ınfraqurylymdy, turǵyn úılerdi jáne áleýmettik nysandardy qalpyna keltirý úshin qarjylaı kómek kórsetedi, dep habarlaıdy ulttyq kompanııanyń baspasóz qyzmeti.
Búgin kompanııa basshysy sý tasqyny kezeńine baılanysty qalyptasqan jaǵdaı boıynsha jınalys ótkizdi.
QMG Basqarma tóraǵasy Maǵzum Myrzaǵalıev enshiles uıymdarǵa jergilikti atqarýshy organdarymen birlesip, qajetti kómek kólemin shuǵyl anyqtaýdy tapsyrdy. Kompanııa qarajatty óndiristik qyzmetin júrgizetin óńirlerge (Aqtóbe, Atyraý, Batys Qazaqstan jáne Pavlodar oblystary) jiberetin bolady.
«Biz kóktemgi sý tasqyny saldaryn joıý jumystarynan shet qalmaı, zardap shekken aımaqtarǵa kómek kórsetý úshin kúsh biriktiretin bolamyz. QazMunaıGaz — áleýmettik jaýapty ulttyq kompanııa. Sondyqtan eldiń múddesi men azamattardyń amandyǵy — basty nazarymyzda. Osyndaı qıyn-qystaý kezeńde muqtaj jandarǵa qol ushyn berý — bizdiń parymyz», — dedi M.Myrzaǵalıev.
Qazirgi ýaqytta «QazMunaıGaz-Aero» JShS (QMG enshiles kásiporny) evakýatsııalyq tikushaqtarǵa janarmaı quıý jumystaryn jedeldetý maqsatynda Aqtóbe oblysynyń zardap shekken aýdandaryna baryp, kómek berýde. «QazMunaıGaz-Aero» JShS qyzmetkerleri táýlik boıy QR Tótenshe jaǵdaılar mınıstrliginiń, Qorǵanys mınıstrliginiń, Ulttyq ulannyń ushaqtaryn janarmaımen qamtamasyz etý baǵytyndaǵy jumystardy jalǵastyrýda.
