Sý tasqyny: Qazaqstanǵa gýmanıtarlyq kómek kerek pe

ASTANA. KAZINFORM – Syrtqy ister mınıstrliginiń resmı ókili Aıbek Smadııarov elimizdiń óńirlerindegi sý tasqynynan keıin kórshi memleketten kelgen gýmanıtarlyq kómekke qatysty túsinik berdi.

«Qazirgi kezde Qazaqstannyń birqatar óńirinde sý tasqyny saldarynan qalyptasqan jaǵdaıǵa baılanysty baýyrlas Qyrǵyz memleketi óz bastamasymen kómek jasady. Osydan 2 kún buryn Qyrǵyz Respýblıkasynyń Tótenshe jaǵdaı mınıstrligi 15 júk kóligi men 1 jol talǵamaıtyn kóligi Qazaqstan shekarasyn kesip ótti. Onda 300 tonna júk bar. Júktiń quramynda sý, kúrish, qaraqumyq jarmasy, kámpıt, shaı, qant jáne taǵy basqa azyq-túlik jiberildi. Sondaı-aq jylytqyshtar, kerýentter, shatyrlar jáne taǵy basqa da kerek zattar tıelgen», - dedi A.Smadııarov vedomstvodaǵy aptalyq baspasóz máslıhatynda.

Sonymen qatar ol kóptegen baýyrlas ári dostas elderden telegramma kelip jatqanyn aıtty.

«Olar óz qoldaýyn aıtyp, nıet bildirip jatyr. Atap aıtqanda, elimizde jedel shtab quryldy. Premer-Mınıstrdiń barlyq orynbasary tıisti óńirlerde júr. Olar óńirlerdegi jaǵdaıdy baqylaýda ustap otyr. Materıaldyq rezervtiń áleýetin qoldanyp jatyrmyz. «Qazaqstan halqyna» qory men halyq ta kómektesip jatyr. Úkimet osy baǵytta tolyqqandy jumysty atqaryp otyr», - dedi resmı ókil.

Bul turǵyda tilshiler «ázirge, elimizge syrttan kómek kerek emes pe?» dep surady.

«Qazir ózimiz bárine úlgerip jatyrmyz jáne tıisti kómek jasalyp otyr. Bul rette, naqty reglament joq. Eger bir el kómektesemin dep sheshse, onda júkti baǵyttaı beredi. Halyqaralyq tájirıbege sáıkes, memleket ózi kómek surasa, onda basqa elder gýmanıtarlyq kómekti jiberedi», - dep naqtylady Aıbek Smadııarov. 

Budan buryn habarlanǵandaı, jaqynda Qyrǵyzstannyń Tótenshe jaǵdaılar mınıstrliginiń qutqarýshylary sý tasqynynan zardap shekken Qazaqstan halqyna 300 tonna gýmanıtarlyq júk jiberdi.