Sý tasqyny: Qazaqstan kórshi eldermen málimet qalaı almasady
ASTANA. KAZINFORM — Qazaqstan sý tasqyny jaǵdaıyna turaqty monıtorıng júrgizip, halyqaralyq kelisimder aıasynda kórshi memlekettermen aqparat almasady. Yntymaqtastyq Qytaı, Reseı jáne Ortalyq Azııa elderin qamtıdy.
Reseımen málimet almasý
Qazaqstan men Reseı arasyndaǵy Transshekaralyq sý nysandaryn birlesip paıdalaný jáne qorǵaý týraly kelisimniń 9-babyna sáıkes, taraptar gıdrometeorologııalyq, gıdrologııalyq, gıdrohımııalyq jáne sý sharýashylyǵy aqparattaryn almasyp otyrady.
— 2025 jyldyń basynan Qazaqstan-Reseı birlesken jumys toby isteıdi. Olar sý tasqyny týraly málimetterdiń kún saıyn almasyp otyrýyn qamtamasyz etedi. Іs-sharaǵa eki eldiń sý sharýashylyǵynyń ókiletti uıymdary men jergilikti atqarýshy organdary qatysady. Olar kóktemgi sý jiberý, gıdrotehnıkalyq qurylystar men sý nysandarynyń jaı-kúıi týraly aqparattardy beredi, — dedi Sý resýrstary jáne ırrıgatsııa mınıstrliginen.
Bıyl Qazaqstan men Reseı sý tasqynyna aldyn ala daıyndalý úshin transshekaralyq ózender boıynsha kúndelikti aqparat almasýdy bastap ketti.
— Ózgeristerge shuǵyl áreket etý úshin sý sharýashylyǵynyń jaı-kúıine táýlik boıy monıtorıng júrgizilip otyr. Málimet almasý sý tasqyny kezeńi aıaqtalǵanǵa deıin jalǵasady, — dep atap ótedi vedomstvodan.
Qytaımen yntymaqtastyq
2005 jyldan beri Qazaqstan men Qytaı arasynda transshekaralyq ózenderdi tabıǵı apat bolǵan jaǵdaıda shuǵyl habarlaý týraly kelisim bar. Onyń aıasynda taraptar sý tasqyny men muz qatý qubylystary týraly bir-birine aqparat berýge mindetti.
— Shuǵyl habarlaý ólshemsharttary bekitilgen. Olar negizgi gıdrobeketterde qoldanylady: Іle — Sandaohetszy, Ertis — Nanvan, Tekes — Tekes ózenderi boıynsha, — dep túsindiredi Sý mınıstrliginen.
Ortalyq Azııa elderimen aqparat almasý
Qazaqstan Syrdarııa basseındegi sý sharýashylyǵy ahýalyn úılestirý úshin Memleketaralyq úılestirýshi sý sharýashylyǵy komıssııasy arqyly Qyrǵyzstanmen jáne Ózbekstanmen ózara is-qımyldy jolǵa qoıǵan.
— «Naryn-Syrdarııa sý qoımalary qulamasy» boıynsha jedel málimetter almasý turaqty júrgiziledi. Sonymen qatar Shý jáne Talas ózenderi basseıni boıynsha Qazaqstan men Qyrǵyzstan memleketaralyq qoldanystaǵy sý sharýashylyǵy qurylystaryn paıdalaný týraly 2000 jylǵy kelisim aıasynda ózara is-qımyl jasaıdy, — dedi mınıstrlikten.
Tótenshe jaǵdaı týyndaǵan jaǵdaıda taraptar bir-birine dereý habar berýge, sý tasqynynyń aldyn alý jáne saldaryn joıý úshin is-qımyldaryn úılestirýge mindetti.
Aıta keteıik, vıtse-premer Qanat Bozymbaev jumys sapary barysynda Atyraý jáne Aqtóbe oblystaryndaǵy qaýipti aımaqtardy tekserdi.
Al elimizdiń Sý resýrstary jáne ırrıgatsııa mınıstrligi tasqyn sýyn qabyldaý jáne qaýipsiz ótkizý úshin elimizdiń soltústik, batys, shyǵys jáne ortalyq aımaqtaryndaǵy iri sý qoımalarynan sý jiberip jatyr.