Sý tasqyny qaýpin ekonomıkalyq turǵydan baǵalap, kartaǵa túsirý qajet – maman

ASTANA. KAZINFORM – Geografııa jáne sý qaýipsizdigi ınstıtýty AQ basqarma tóraǵasy Ahmetqal Medeý óńirlerdi topan sý basý jaǵdaıyna qatysty pikir bildirdi.

«Bizge birqatar ǵylymı zertteý júrgizý qajet. Birinshiden, sý tasqyny qaýpin baǵalaý, oǵan qatysty derekterdi retrospektıvti taldaý jáne sý tasqynynyń sebep-saldary men aldyn alý sharalaryn naqtylaý qajet. Sondaı-aq, tasqyn kezindegi sý rejıminiń sıpattamalaryn anyqtap, statıstıkalyq taldaý jasaǵan jón. Ekinshiden, sý tasqynynyń teris áseri ıaǵnı qaýpin saralaý jumystary. Biz sý tasqyny qandaı jaǵdaıda bolatynyn bilemiz, endi sý tasqynyna beıim retsıpıentterdi anyqtaý qajet», - dedi Ahmetqal Medeý OKQ-de ótken brıfıngide.

Mamannyń aıtýynsha, sý tasqynynyń aldyn alý is-sharalar keshenine uıymdastyrý-sharýashylyq, melıoratıvtik, ınjenerlik-tehnıkalyq jumystar kiredi.

«Bul jaǵdaıda halyq pen ınfraqurylym týraly aıtý kerek. Táýekelderdiń deńgeıin joǵary, ortasha, tómen dep bólip, tıisti jumystardy qoldanǵan abzal. Sý tasqyny qaýpin ekonomıkalyq baǵalaý jáne olardy kartaǵa túsirý qajet. Joǵaryda atalǵan sharalar men ǵylymı zertteýler alapat sý tasqynynyń aldyn alý men onyń qaýpin azaıtýǵa múmkindik beredi. Bul sharalardy sý tasqynyna deıin jáne keıin de qoldanýǵa bolady», - deıdi ǵalym.