Sý tasqyny qaýpi bar: Qazaqstannyń 3 oblysy baqylaýǵa alyndy

ASTANA. KAZINFORM – Tótenshe jaǵdaılar mınıstrligi el óńirlerindegi sý tasqyny jaǵdaıyn baıandady. Qaýip seıilmegen ýchaskelerde sý tasqynyna qarsy is-sharalar jalǵasyp jatyr. Bul is-sharalarǵa azamattyq qorǵaý qyzmetteri qatysady.

Vedomstvonyń habarlaýynsha, 1 naýryzdan beri 5,2 mıllıonnan astam tekshe metr sý soryldy, 684 myń qapshyq jáne 44 myń tonna ınertti materıaldar tóselgen. Sonymen birge, 842 myńnan astam metr aryq tazartylǵan. Avarııalyq-qutqarý jumystaryna 288 adam, 121 tehnıka, 33 motopompa jáne 6 júzý quraly jiberilgen.

Aqmola jáne Soltústik Qazaqstan oblystaryndaǵy avtokólik joldarynyń 2 ýchaskesinde tasyǵan sý baqylaýda tur. Aqmola oblysy Astrahan aýdanynyń Eski Qalqutan aýylymen kólik qatynasy úzildi. Onda turǵyndar úshin ótkel jasalyp, aýylǵa kirer joldy qalpyna keltirilip jatyr. 

− Qazirgi ýaqytta úsh óńir – Soltústik Qazaqstan, Shyǵys Qazaqstan jáne Abaı oblystary baqylaýǵa alynǵan. ShQO-da sý tasqyny jaǵdaıyna táýlik boıy monıtorıng júrgizilip jatyr. Qazirgi ýaqytta oblys aýmaǵynyń 38%-ynda qar bar. Aýa temperatýrasynyń kóterilýine baılanysty, shaǵyn ózender sýǵa tolýy múmkin. Sý tasqyny qaýipti ýchaskelerde sý deńgeıi turaqty túrde ólshenedi, - dep jazylǵan mınıstrlik habarlamasynda.

Soltústik Qazaqstan oblysynda ózenderge monıtorıng júrgizilip jatyr jáne jaǵdaı turaqty. Zarechnoe kentinde qap tóseý jáne qorǵanys bilikterin nyǵaıtý boıynsha sý tasqynyna qarsy sharalar qolǵa alynǵan.

Abaı oblysynda ózenderdegi gıdrojaǵdaı turaqty, muz tolyǵymen eridi jáne monıtorıng jalǵasýda. Jazyq aýmaqta qar erip, ózenderdegi seń júrisi aıaqtaldy, qar tek Tarbaǵataı taý jotalarynda baıqalady.

Buǵan deıin Petropavlǵa sý tasqynynyń úshinshi tolqyny kele jatqany habarlanǵan edi.