Sý tasqyny qarsańynda kólik ınfraqurylymyna erekshe baqylaý engizildi
ASTANA. KAZINFORM — Sý tasqyny qarsańynda kólik ınfraqurylymyna erekshe baqylaý engizildi. Kólik mınıstri Nurlan Saýranbaevtyń tapsyrmasymen respýblıkalyq mańyzy bar joldar, temirjoldar men áýejaılardyń daıyndyǵy kúsheıtildi. Qaýipti ýchaskelerde táýlik boıy kezekshilik uıymdastyrylyp, sý ótkizgish qubyrlar men kópirler tazartylyp, joldardy qorǵaýǵa qajetti materıaldar aldyn ala daıyndalyp jatyr. Bul týraly vedomstvonyń baspasóz qyzmeti málim etti.
Mınıstrlik basshysy respýblıkalyq mańyzy bar temirjol jáne avtomobıl joldarynyń daıyndyǵyn, sondaı-aq áýejaılarda sý tasqynyna qarsy is-sharalardyń júrgizilýin erekshe baqylaýǵa alýdyń mańyzdylyǵyn atap ótti.
Sonymen qatar óńirlerde atqarylyp jatqan sý tasqynyna qarsy jumystar boıynsha kún saıynǵy esep berýdi jáne qaýipti ýchaskelerde táýlik boıy kezekshilikti qamtamasyz etý tapsyryldy. Joldardy qorǵaý úshin qajetti materıaldardy daıyndaýǵa erekshe nazar aýdaryldy. Atap aıtqanda, ınertti materıaldar, qum, být tasy, qum-qıyrshyq tas qospasy, qaptar jáne basqa da resýrstardy ázirleý máseleleri qaraldy.
Sondaı-aq mınıstr sý ótkizgish qubyrlar, kópirler jáne basqa da jasandy qurylystardy qar men qoqystan tazartýdy qamtamasyz etýdi, joǵary qaýipti aımaqtarda aldyn ala aınalma joldardy pysyqtaýdy tapsyrdy. Qabyldanǵan sharalar kólik ınfraqurylymyn sý tasqyny kezeńine daıyndaýǵa, halyqtyń qaýipsizdigin qamtamasyz etýge jáne kólik júıesiniń úzdiksiz jumys isteýine baǵyttalǵan.
Buǵan deıin joldardaǵy sý shaıý qaýpi bar 229 ýchaske Kólik mınıstrliginiń baqylaýyna alynǵanyn jazǵan edik.