Sý tasqyny elimizdiń sý sharýashylyǵyna qalaı áser etti
ASTANA. KAZINFORM – Sý resýrstary jáne ırrıgatsııa mınıstri Nurjan Nurjigitov bıylǵy tasqynnyń elimizdiń sý sharýashylyǵyna áseri týraly aıtty.
«Sý tasqynynyń saldary ǵana emes, ekonomıka salalarynyń qajettilikteri úshin qoımalarda 12 mlrd tekshe metrden astam sý jınaldy. Ótken jyly sý tasqyny kezeńinde sý qoımalarynan jalpy sý aǵyzý shamamen 13 mlrd tekshe metrdi qurasa, bıyl bir aıda 36 mlrd tekshe metrden asty. Bul bıylǵy sý tasqynynyń aýqymdylyǵyn kórsetedi. Tasqyn kezinde sý sharýashylyǵy nysandary topan sýmen kúrese bildi, osylaısha sońǵy jyldary sý tapshy obektilerge tasqyndy jiberý múmkindigi týdy», - dedi Nurjan Nurjigitov Úkimet otyrysynda baıandama jasap.
Odan ári mınıstr elimizdegi sý qoımalaryndaǵy jaǵdaıǵa toqtaldy.
«Q.Sátbaev atyndaǵy kanal arqyly sý toltyrylatyn Astana sý qoımasyna tasqyn sý jiberilip, 2 mlrd teńgeden astam qarajat únemdeldi. Sondaı-aq, tasqyn kópten beri sý kelmegen jerlerge baǵyttalyp, ekologııalyq jaǵdaıdy jaqsartty deýge bolady. Batys Qazaqstan oblysynyń Qamys-Samar kólderine 80 mln tekshe metr sý jiberildi. Ulytaý oblysynan Qyzylorda oblysyna 839 mln tekshe metr sý jiberildi. Tarıhta alǵash ret Sarysý ózeni arqyly Qyzylorda oblysynyń kól júıelerine sý jetkizildi. Jyl basynan beri Balqash kóline 12 mlrd tekshe metr sý, onyń ishinde sý tasqyny kezinde 3,3 mlrd tekshe metr, Kaspıı teńizine 7,4 mlrd tekshe metr sý jóneltildi», - deıdi ol.
