Sý tasqyny eldi mekenderge kóp qoqys ákeldi, saldarynan órt shyǵý qaýpi artty – SQO TJD
PETROPAVL. KAZINFORM – Soltústik Qazaqstan oblysynda órt qaýpi joǵary kezeń bastalǵaly 3,4 ga aýmaqta 14 órt tirkelgen. Qýraǵan shóp pen qoqys janǵan. Orman-dala órti bolǵan joq.
SQO Tótenshe jaǵdaılar departamenti bastyǵynyń orynbasary Dmıtrıı Rastıhın óńirde órt qaýpi joǵary kezeńniń ótý barysynan habardar etti. Byltyr osy aralyqta qoqys pen qýraǵan shóptiń janýynyń 98 deregi tirkelgen. 26,8 ga aýmaqta 6 orman órti bolǵan. Bıyl órt qaýipti kezeń aýqymdy sý tasqynyna baılanysty óńirde kesh bastalǵan.
«Órttiń aldyn alý úshin quramynda 366 adam bar 53 mobıldi top qurylǵan. Reıdter júrgizilip jatyr. 43 adam ákimshilik jaýapkershilikke tartyldy.
Sońǵy úsh jylda birneshe iri órt tirkeldi. Saldarynan 12 jeke turǵyn úı jáne saıajaı qoǵamdastyǵyndaǵy 200 úı-jaı janyp ketti.
Órttiń tez taralýyna qýraǵan shóp pen qamystyń jınalmaýy, mıneraldanǵan jolaqtardyń joqtyǵy sebep bolǵan», - deıdi Dmıtrıı Rastıhın.
Mamannyń aıtýynsha, óńirde órttiń aldyn alýǵa baǵyttalǵan jumys óte baıaý júrgizilip jatyr.
«Bıyl eldi mekender aınalasynda 2102 km mıneraldanǵan jolaqtar jasalýy tıis bolsa, sonyń tek 125 km ǵana istelingen. 636 eldi mekenniń tek 147-sinde ǵana aýmaqtar qoqystan, kepken shópten tazartylǵan.
Sońǵy úsh jylda Qyzyljar aýdanyndaǵy «Serebrıannyı bor» jáne «Zolotaıa osen» balalar lagerlerinde eki ret órt shyqty. Sondyqtan orman mańynda ornalasqan oblystaǵy 67 eldi meken, 15 saýyqtyrý lageri jáne 41 demalys aımaǵy erekshe baqylaýda bolýy tıis», - deıdi Dmıtrıı Rastıhın.
