Sý tasqyny bolǵan óńirlerge Astanadan taǵy 20 tonna gýmanıtarlyq kómek jiberildi
ASTANA. KAZINFORM – Buǵan deıin Astanadan sý tasqynynan zardap shekken óńirlerge 600 tonnadan astam gýmanıtarlyq kómek jiberilgen bolatyn. Endi «Astana jastary» jastar resýrstyq ortalyǵy Ekonomıkalyq tergeý departamentimen birlesip, eki júk kólik, 20 tonna gýmanıtarlyq kómek jınady. Onda Qostanaı oblysyndaǵy sý tasqynynan zardap shekkenderge azyq-túlik, kıim-keshek jáne birinshi kezektegi qajet zattar bar, - dep jazdy ákimdiktiń resmı saıty.
«Evakýatsııalyq pýnktterdegi adamdarǵa kúrish, un, qant, qaraqumyq, shaı, sondaı-aq kúnbaǵys maıy sııaqty azyq-túlik qajet. Adamdar kóp jınalatyn jerlerde qoqys jınaýǵa kómektesetin qoqys paketteri qajet», - dedi qalalyq eriktiler shtaby tóraǵasynyń orynbasary Elvıra Esmuhanova.
Shtab eriktileri kómekke jyly kıim, aýyzsý, balalar taǵamy, turmystyq taýarlar, balalar kıimderi, kórpeler, tósek japqyshtar men jastyqtardy qabyldaıdy.
Sonymen qatar 500-den astam erikti qajetti zattardy suryptaýǵa jáne jiberýge kómektesedi. Gýmanıtarlyq kómek sý tasqynynan zardap shekken óńirlerge jiberiledi.
Esterińizge sala keteıik, elordada gýmanıtarlyq kómekti qabyldaıtyn 9 pýnkt jumys isteıdi. Jıynǵa 30-ǵa jýyq eriktiler uıymy qatysady. Kún saıyn 200-den astam erikti qajetti zattardy suryptaıdy jáne jiberedi.
Nıet bildirýshiler jyly kıim, azyq-túlik, dári-dármek, qajetti zattardy ákeledi. Eriktiler qarjylyq kómekti qabyldamaıdy. Nıet bildirýshiler jınaý oryndaryna qajetti ónimderdi jınap, ákele alady.
Buǵan deıin Astanadan SQO-ǵa qosymsha 300 áskerı qyzmetshi jiberilgenin jazǵan bolatynbyz.
