Sý tasqyny bolǵan aımaqtarda ınfektsııalyq aýrýlardyń taralýyna jol berilmedi – DSM
ASTANA. KAZINFORM – Sý tasqyny bolǵan aımaqtarda ınfektsııalyq aýrýlardyń taralýyna jol berilmedi. Bul týraly Densaýlyq saqtaý mınıstrliginiń resmı ókili Áıgerim Orazalıeva aıtty.
«Sý tasqyny bastalǵan sátten bastap, medıtsınalyq uıymdar medıtsınalyq kómektiń barlyq túriniń qoljetimdiligin qamtamasyz etý úshin tolyq daıyndyq rejıminde jumys istedi. Osylaısha jedel medıtsınalyq járdem qyzmetteriniń, statsıonarlardyń qabyldaý pýnktteriniń jáne MSAK uıymdarynyń jumysy kúsheıtildi. Sý tasqyny bastalǵannan beri evakýatsııalyq pýnktterde táýlik boıy jumys isteıtin 106 medıtsınalyq post ornalastyryldy. Evakopýnktterde medıtsınalyq jáne medıtsınalyq-psıhologııalyq kómek kórsetý úshin 600-ge jýyq medıtsına qyzmetkeri, onyń ishinde 101 dáriger, sondaı-aq 47 psıholog jumyldyryldy», - dedi ol Ortalyq kommýnıkatsııalar qyzmetindegi brıfıngte.
Onyń dereginshe, sý tasqyny bolǵan aımaqtarda zardap shekken azamattardy ýaqytsha ornalastyrý ortalyqtaryna shyǵatyn mobıldik brıgadalar uıymdastyryldy. Júkti áıelderdiń, balalardyń jaǵdaıyna turaqty medıtsınalyq baqylaý júrgizilýde. Jergilikti jerlerde naqty úılestirýdiń arqasynda patsıentter shtattyq rejımde dári-dármekter men medıtsınalyq buıymdardy alýdy jalǵastyryp jatyr.
«Sý basqan aımaqtardan evakýatsııalanǵandardyń arasynda densaýlyq jaǵdaıy dárigerlerdiń baqylaýynda bolatyn sozylmaly aýrýlary bar 1 318 adam tirkelgen. Sý tasqyny saldarynan zardap shekkenderden psıhologııalyq kómekke 2 805 ótinish tústi. Tabıǵı apattyń barlyq kezeńinde sý basqan eldi mekenderden 445 júkti áıel evakýatsııalandy, 474 bosandyrý qaýipsiz qabyldandy. Barlyq sábı men ana patronajdyq qyzmetterdiń qamqorlyǵynda. Sý basqan aýdandarda barlyǵy 4 mynnan astam bala evakýatsııalandy. 65 kishkentaı patsıent ambýlatorııalyq jáne statsıonarlyq deńgeıde emdelýdi jalǵastyryp jatyr», - dedi Áıgerim Orazalıeva.
Resmı ókildiń atap ótýinshe, ınfektsııalyq aýrýlardyń týyndaýynyń aldyn alý maqsatynda sanıtarııalyq-epıdemıologııalyq qyzmettiń jumysy kúsheıtilgen rejımge aýystyryldy. Sanıtarııalyq-epıdemıologııalyq qyzmetter sýmen jabdyqtaý kózderine kúndelikti kúsheıtilgen monıtorıng pen baqylaýdy júrgizedi. Sý tasqyny bastalǵannan beri sanıtarııalyq-hımııalyq jáne mıkrobıologııalyq kórsetkishterge 11 myńǵa jýyq aýyz sý synamasy iriktelip, zertteldi.
«Kúsh-jigerimizdi epıdemııalyq mańyzy bar nysandardy durys dezınfektsııalaýǵa baǵyttadyq. Sanıtarııalyq-epıdemıologııalyq qyzmettiń baqylaýymen osyndaı 6 myńnan astam nysanǵa dezınfektsııa júrgizildi. Dárigerler men sanıtarııalyq-epıdemıologııalyq qyzmettiń úılesimdi is-qımyldarynyń nátıjesinde ınfektsııalyq aýrýlardyń, sonyń ishinde ishektiń, ýlanýdyń órshýi jaǵdaılaryna jol berilmedi», - dedi ol.
