Sý tasqyny bolǵan aımaqtarda 253 áıel bosandy – QR DSM
ASTANA. KAZINFORM – Sý tasqynynan zardap shekken óńirlerde 66 medıtsınalyq pýnkt jumys istep jatyr. Bul týraly QR Densaýlyq saqtaý mınıstrliginiń resmı ókili Áıgerim Orazalıeva aıtyp berdi. Onyń aıtýynsha, sý basqan óńirlerde búginde dári-dármekter men medıtsınalyq buıymdar qory jetkilikti.
«Tótenshe jaǵdaı rejımi jarııalanǵan barlyq óńirde 309 júkti áıel baqylaýda tur jáne 253 áıel bosandy. Eń kóp bala Qostanaı, Aqtóbe jáne Batys Qazaqstan oblystarynda dúnıege kelgen. Evakýatsııalyq pýnktterde 5 300-ge jýyq bala bar, onyń ishinde 71 bala statsıonarlyq kómek alady, 87 bala ambýlatorııalyq em alýda», - dedi spıker Respýblıkalyq aqparattyq shtabta ótken brıfıngide.
Sondaı-aq pýnktterde medıtsınalyq jáne medıtsınalyq-psıhologııalyq kómek kórsetý úshin 1 116-dan astam medıtsına qyzmetkeri, onyń ishinde 278 dáriger, 838 meıirger, 79 psıholog tartylǵan.
Sanıtarııalyq-epıdemıologııalyq baqylaý maqsatyńda sý tasqynynan zardap shekken óńirlerde halyq paıdalanatyn aýyz sý sapasyna turaqty monıtorıng júrgiziledi.
«Densaýlyq saqtaý mınıstri Aqmaral Álnazarova Batys Qazaqstan oblysyna sapar barysynda «Batys Sý Arnasy» kompanııasynyń sýdy tazartýdyń tehnologııalyq shemasymen jáne aýyz sýdyń sapasyn baqylaý zerthanasynyń jumysymen tanysty. Sondaı-aq Ulttyq saraptama ortalyǵynyń Batys Qazaqstan oblystyq fılıalynyń aýyz sý men tamaq ónimderiniń sapasyn baqylaýda sheshýshi ról atqaratyn zerthanalarynyń jumysyn baǵalady. Munda aýyz sý qaýipsizdigi maqsatynda sý úlgileri boıynsha zertteýler kún saıyn júrgiziledi», - deıdi Á. Orazalıeva.
Solardyń nátıjeleri boıynsha búgingi kúni ınfektsııalyq aýrýlardyń sý arqyly taralý qaýpi tómen. Sý qaýipsizdigin qamtamasyz etý máseleleri Densaýlyq saqtaý mınıstrliginiń kúndelikti baqylaýynda tur.
