Sý tasqyny: BQO polıtseılerine Shymkentten gýmanıtarlyq kómek jetkizildi
ORAL. KAZINFORM — Batysqazaqstandyq polıtsııa qyzmetkerlerine sý basqan aýmaqtardan turǵyndardy evakýatsııalaý jumystary úshin Shymkent qalasynan Qazaqstandyq sporttyq atý federatsııasynan gýmanıtarlyq kómek jetkizildi.
BQO polıtsııa departamentiniń baspasóz qyzmetinen málim etkenindeı, kómek quraldarynyń ishinen sý qaýpinen qorǵanatyn birneshe qaıyq, qaıyq motorlary, qutqarý jıletteri, rezeńke etik, kombınezondar jáne basqa zattardy aıtýǵa bolady.
Elimizdiń birneshe oblysyndaǵy sý tasqynyna baılanysty tabıǵı apat aımaǵyndaǵy turǵyndarǵa kómek qolyn sozyp jatqan janashyr jandar az emes. Bul – sonyń bir kórinisi.
Batys Qazaqstan oblysynan saılanǵan Senat depýtaty Lázzat Rysbekova BQO polıtsııa departamentiniń quqyqtyq tártip jáne arnaıy daıyndyq bazasynda bolyp, polıtseılerdiń kúshteri men quraldaryn daıyndaý qyzmetimen tanysty.
Polıtsııa departamentiniń bastyǵy, polıtsııa polkovnıgi Arman Orazalıevtiń aıtýynsha, aeroglıfer, motorly qaıyqtar jáne basqa arnaıy quraldar adamdardy evakýatsııalaý men qutqarý úshin, sondaı-aq sý basý oryndaryn patrýldeý jáne urlyq pen tonaýǵa jol bermeý úshin qoldanylatyn bolady.
«Táýlik boıy qoǵamdyq tártipti qazirgi ýaqytta 580 polıtsııa qyzmetkeri, sonymen qatar tártip saqshylary rezerviniń 200 adamy qamtamasyz etýde. Qosymsha QR Ulttyq ulany men QR Qorǵanys mınıstrliginiń 500 áskerı qyzmetshisi kómekke keldi. Sý tasqyny kúsheıgen jaǵdaıda qoǵamdyq tártipti saqtaý men azamattardyń qaýipsizdigin 3 myńǵa jýyq polıtseı men Ulttyq ulan jaýyngerleri qamtamasyz etetin bolady. BQO-daǵy jaǵdaı ishki ister mınıstriniń baqylaýynda, óńirdegi jaǵdaı oǵan saǵat saıyn jeke baıandalady», dedi A.Orazalıev.
Batysqazaqstandyq polıtseıler Qazaqstandyq sporttyq atý federatsııasyna kórsetken kómegi úshin alǵys bildirdi.
Eske sala keteıik, budan buryn Batys Qazaqstanda 13 myńnan astam adamnyń evakýatsııalanǵanyn jazǵan bolatynbyz.
Sondaı-aq Irıkla sý qoımasynan Jaıyqqa sekýndyna 447 tekshe metr sý jiberilip jatyr.
