Sý tasqyny: BQO-ǵa vedomstvolardyń qosymsha kúshteri baǵyttaldy

ASTANA. KAZINFORM – Oral qalasy tóńiregindegi sý basqan saıajaılar turǵyndary aldyn ala qaýipsiz jerge kóshirildi. Bul týraly QR Tótenshe jaǵdaılar mınıstrliginiń ókili Asqar Shárip aıtty.

«Jaıyq ózeni sý deńgeıi kóterilip, Oral qalasynyń shetinde ornalasqan saıajaı aýmaqtaryn sý basty. Batys Qazaqstan, Qyzylorda oblystary, Astana qalasy TJD qutqarýshylary jáne Tótenshe jaǵdaılar mınıstrliginiń 28237 áskerı bóliminiń qyzmetshileri saıajaı úılerinde turǵyndardyń bar-joǵyna tekserip, ózen jaǵasyn bekitý, qapshyqtar jáne ınertti materıaldar tóseý, jumystaryn atqaryp jatyr. Adamdar aldyn ala evakýatsııalanǵan», - dedi A. Shárip Ortalyq kommýnıkatsııalar qyzmetindegi brıfıngide. 

Onyń aıtýynsha, jergilikti polıtsııa qyzmetkerleri atalǵan aýmaqta tartylǵan. Aqtóbe oblysynan Tótenshe jaǵdaılar mınıstrliginiń, sondaı-aq Іshki ister mınıstrliginiń qosymsha kúshteri men quraldar Batys Qazaqstan oblysyna jiberildi.

Budan buryn habarlanǵandaı, Oral qalasy tóńiregindegi saıajaılar sýǵa ketip jatyr. 

Jalpy, óńirdegi tıisti qurylymdar kúsheıtilgen rejımde jumys istep jatyr. Oblysqa 2 myńnan astam tehnıka, sonyń ishinde 1 myńnan astam arnaıy tehnıka jumyldyryldy. Atap aıtqanda, 10 myńnan astam adam sý tasqynyna qarsy jumystardy atqaryp jatyr.