Sý tasqyny: BQO-da respýblıkalyq jol opyrylyp ketti
ORAL. KAZINFORM — Batys Qazaqstan oblysynda respýblıkalyq mańyzy bar Podstepnyı-Terekti-RF shekarasy jolynyń 35 shaqyrymynda jol opyrylyp ketti.
«QazAvtoJol» UK» AQ BQO fılıaly dırektorynyń orynbasary Damır Tileýbaevtyń málim etkenindeı, oqıǵa 1 sáýir kúni saǵat 18.32-de boldy.
Onyń aıtýynsha, sý ótkizgish qubyr men jol tósemin sý basyp, joldyń qurylymdyq qabattary shógip ketti.
Búlingen aýmaq qalpyna keltirilip, opyrylǵan jerge ınertti materıal tóselýde. Qazir osy jerde ekskavator, tıegish, júk kólikteri sekildi 14 arnaıy tehnıka, 20 maman jumys istep jatyr. Merdiger – «Kazkomservıs» JShS. Joldy qysqa merzim ishinde, búgin keshke deıin qaıta paıdalanýǵa berý kózdelip otyr.
«Osy apattyń saldarynan atalǵan tas joldyń 35-shaqyrymynda kólik qozǵalysy shekteldi. Joldyń osy aýmaǵy 2023 jyly salyndy, ony 2025 jyly tapsyrý josparlanǵan. Sondyqtan qurylys jumystary tolyq bitken joq: joldyń astyndaǵy sý ótkizgish qubyrdyń irgesin bekitý jumystary tolyq aıaqtalmady. Sonyń saldarynan joldyń qurylymdyq qabaty shógip, sý shaıyp ketti. Qys kezinde jumys toqtatylǵandyqtan, jolaýshylardyń jaılylyǵy úshin joldyń osy bóliginde qozǵalys ýaqytsha ashylǵan bolatyn. Qurylys maýsymy bastalǵanda, bul jer qaıta jabylyp, kólik qatynasy aınalma jol arqyly júrgiziledi», dedi D.Tileýbaev.
Onyń sózine qaraǵanda, jol tósemin qalpyna keltirý úshin asfalt qabaty alyndy. Táýlik boıy kezekshilik ornatylyp, jóndeý jumystary túnimen júrgizildi, qazir de jalǵasyp jatyr. Merdiger qalpyna keltirý jumystaryn óz esebinen júrgizýde.
Óńirde 26 naýryzdan beri birneshe ret osyndaı oqıǵa boldy. Atap aıtqanda, Samara-Shymkent jolynyń 479 jáne 428, sonymen qatar Podstepnyı-Terekti jolynyń 11, 13-shaqyrymyn (Poıma aýyly mańynda) erigen qar sýy basyp ketti. Biraq tıisti sharalardy jedel atqarýdyń nátıjesinde jol búlingen joq.
Eske sala keteıik, budan buryn Batys Qazaqstan oblysynda tótenshe jaǵdaı jarııalanǵanyn jazǵan bolatynbyz.
Sondaı-aq sý tasqynyna baılanysty Batys Qazaqstan oblysynda 10 eldi meken qatynassyz qaldy.
