Sý tasqyny: BQO-da mal shyǵyny boıynsha ótemaqy qalaı berilip jatyr

ORAL. KAZINFORM – Batys Qazaqstan oblysynda sý tasqyny saldarynan shyǵynǵa ushyraǵan mal ıelerine ótemaqy berilip jatyr.

BQO aýyl sharýashylyǵy basqarmasy basshysynyń mindetin atqarýshy Rústem Zulqashevtiń málim etkenindeı, oblys boıynsha kúni búginge deıingi málimetke sáıkes 2 342 bas maldyń ólgeni tirkelse, sonyń 341-i – iri qara, 63-i – jylqy, 1 741-i – qoı-eshki, 116-sy – shoshqa, jáne 81-i – úı qustary.

Rústem Múlkáıulynyń sózine qaraǵanda, aldyn ala esep boıynsha mal ıelerine 187 mln 491,1 myń teńge zııan keltirilgen.

«Qazirgi kezde ótemaqy tóleý boıynsha oblys ákimdiginiń qaýlysy daıyndalyp, atalǵan qarajat bólindi. Qarjynyń 140 mln 162,1 myń teńgesi sáýir, 47,329 mln teńgesi maýsym aıyna qarastyryldy. Osy kezge deıin Syrym, Terekti, Qaratóbe jáne Bórli aýdandarynda 215 iri qara, 732 qoı-eshki, 60 jylqy jáne 43 bas shoshqa úshin 122 mln 341,8 myń teńge tólendi», dedi R.Zulqashev.

Onyń aıtýynsha, shyǵyn kólemi Ulttyq statıstıka bıýrosy jarııalaıtyn aýyl sharýashylyǵy janýarlarynyń túrleri men jynystyq-jas toptary bólinisinde janýarlardyń naryqtyq quny týraly derekter negizinde aıqyndaldy. Mysaly, sútti tabyn sıyrynyń quny 429 607, buqanyń baǵasy 460 394, etti sıyr 409 216, buqasyniki 434 938 teńge kóleminde belgilendi. Sol sekildi saýlyq qoı – 55 987, qoshqar – 58 486, eshki – 30 322, jylqy – 503 888, shoshqa (megejin) 141 861 teńge bolsa, maldyń tólderi úshin de ótemaqy mólsheri anyqtaldy.

Óńirde sý tasqynyna baılanysty shyǵynǵa ushyraǵan mal úshin ótemaqy tóleý jalǵasýda.

Eske sala keteıik, budan buryn Jaıyq sýy BQO-nyń Aqjaıyq aýdanynda saı-salany toltyryp jatqanyn jazǵan bolatynbyz.