Sý tasqyny: BQO-da gýmanıtarlyq kómek qalaı uıymdastyrylyp jatyr
ORAL. KAZINFORM — Batys Qazaqstan oblysynda sý tasqynyna baılanysty kúrdeli jaǵdaı týyndaǵan jerlerge gýmanıtarlyq kómek jetkizilip jatyr.
AMANAT partııasy BQO fılıaly atqarýshy hatshysynyń orynbasary Afıza Semǵalıevanyń aıtýynsha, aldymen «Jastar rýhy» jastar qanatynyń eriktileri Zachagan kentinde qar sýyna tosqaýyl qoıý jumystaryn atqaryp jatqan tótenshe jaǵdaılar qyzmetkerlerine ystyq tamaq, shaı aparyp, qolushyn berdi.
Sodan keıin Qaratóbe aýdanynda Qorjyn aýyly sý astynda qalyp, turǵyndardyń, sonyń ishinde balalardyń ústerinde kıimderiniń juqa ekendigin estigennen keıin tezirek gýmanıtarlyq kómek jetkizý qajettigi týyndady.
«Osy oraıda partııa fraktsııasynyń músheleri, oblystyq jáne qalalyq máslıhat depýtattaryna qarjy jınaý jóninde usynys jasadyq. Sondaı-aq fılıaldar qyzmetkerleri bir kúndik jalaqylaryn aýdardy. Sonyń nátıjesinde 7,2 mln teńge jınaldy. Biz halyqtan qarjy jınaǵan joqpyz, bári óz qarajatymyzǵa jasaldy. Sóıtip, Qorjyn aýyly sýǵa ketkennen keıin kelesi kúni túske deıin 4 tonna gýmanıtarlyq kómek jetkizildi. Sondaı-aq Syrym aýdanyn da sý basqany belgili. Jolshybaı ol jerlerde bolǵanda, turǵyndar balalar kıimderin, jórgekter, gıgıenalyq zattar kerektigin aıtty. Al Almaty oblysy Uzynaǵash aýylynan kelgen sarbazdar aıaqtaryndaǵy etikke sý ketkendikten, keptirip úlgermeı jatyr eken. Kelesi kúni Syrym aýdanyna 4 tonna kómek jetkizildi. Sol sııaqty Terekti aýdany Ańqaty aýylynda dári-dármekter, jańadan týǵan nárestelerge tamaqtar kerek boldy. Olarǵa da qajetti zattar aparyldy. Biz turǵyndar habarlasqan kezde ysyrapshyldyq bolmas úshin ári qarjymyzdy tıimdi jumsaý úshin, naqty ne nárse kerek, sonyń tizimin jasap alamyz», - deıdi A. Semǵalıeva.
Partııa fılıaly atqarýshy hatshysynyń orynbasary osyndaı kómektiń qajettiligine qaraı sý basqan basqa da aýyldarǵa jetkizilip jatqanyn aıtty.
«Jınalǵan qarjymyzdan 1,2 mln teńgemiz qaldy. Osyǵan taǵy da gýmanıtarlyq kómek jóneltemiz. Sonymen qatar partııa fılıaly ǵımaratynda kezekshilik uıymdastyrylyp, Volkswagen, «Jaıyqmotors» ortalyqtarynyń qoldaýymen avtokólikter sý basqan kezde halyqty evakýatsııalaýǵa qatysatyn bolady. Oǵan qosa, respýblıkanyń túkpir-túkpirinen áriptes-partııalastarymyz habarlasyp, kómek qoldaryn sozyp jatyr. Aıtalyq, Shymkent qalasynan 20 tonnalyq azyq-túlik, kıim-keshek, tósek tıelgen arnaıy kólik kele jatyr», - dedi A. Semǵalıeva.
Oblystyq «Jastar rýhy» jastar qanatynyń tóraǵasy Arhat Islamǵalıdiń naqtylaýynsha, óńirde barlyǵy 35 erikti jumys jasap jatyr.
«Budan bólek, Shymkentten gýmanıtarlyq júkpen birge 6 volonter kele jatyr. Eriktiler qapshyqqa qum toltyrý, gýmanıtarlyq júk jetkizý, turǵyndardy evakýatsııalaý jumystaryna belsene qatysyp júr», - dedi A. Islamǵalı.
Eske sala keteıik, budan buryn Batys Qazaqstan oblysynda 430-dan astam úıge sý kirgenin jazǵan bolatynbyz. Óńirde 10 eldi meken qatynassyz qaldy.
