Sý tasqyny: BQO-da demeýshilik qarajattyń jumsalýyna baılanysty qylmystyq is qozǵaldy

ORAL. KAZINFORM – Batys Qazaqstan oblysynda kóktemgi sý tasqynyna daıyndyq kezeńinde ótken jyly jiberilgen kemshilikter bıyl da qaıtalanyp otyr.

BQO prokýrorynyń birinshi orynbasary Dáýren Omarǵalıevtiń málim etkenindeı, ótken jyly sý tasqynyna qarsy is-sharalar josparynyń oryndalmaýyna baılanysty 7 laýazymdy qyzmetker tártiptik, taǵy ekeýi ákimshilik jaýapkershilikke tartylǵan bolatyn.

Onyń sózine qaraǵanda, bıyl oblys ákiminiń 10 qańtardaǵy ókimine sáıkes sý tasqynyna qarsy jumystardy uıymdastyrý boıynsha 1 aqpanǵa deıin shtab qurý qajet boldy. 

Alaıda bul tapsyrma oryndalmaı, Oral qalasynda ákimdik shtabty ýaqytynda qurmaǵan. Tek prokýratýra synynan keıin shtab jasaqtaldy. 

— Sondaı-aq Qaratóbe aýdanynda sý tasqynyna daıyndyq jospary aldyńǵy jylmen birdeı, ıaǵnı jaı kóshirilip alynǵan. Ótken jyly munda Qorjyn aýylynyń túgeldeı sý astynda qalǵany málim. Sol sekildi Jańaqala aýdanynda da jospar sapasyz ázirlengen. Osyndaı kemshilikter úshin Oral qalasy men Qaratóbe aýdanynyń basshysy jáne Jańaqala aýdany ákiminiń orynbasary tártiptik jaýapkershilikke tartyldy, — deıdi BQO prokýrorynyń birinshi orynbasary.

Onyń aıtýynsha, óńirde 57 bógettiń qurylysy bastalǵanymen, 58 aýyl sý basý qaýpinen qutylǵan joq. Bul jumys boıynsha da shaǵymdar bar. Atap aıtqanda, Báıterek aýdanynda 19 bóget boıynsha jobalarǵa saraptama jeke uıymda («Smart Build Expertise» JShS) júrgizilgen. Shyn mánisinde bul jobalar memlekettik saraptamadan ótkizilýi kerek bolatyn.

Prokýratýra málimetine qaraǵanda, ótken jyly sý tasqynynan zardap shekken azamattar men kásipkerlerge kómek esebinde 81 mlrd teńge jumsaldy. Sonyń 13 mıllıardy bıýdjetten, 68 mlrd teńgesi demeýshiler esebinen bólindi. 

— Búgingi tańda Qarjy monıtorıngi agenttigi Perızat Qaırattyń qylmystyq is-áreketin tergep-tekserip jatyr. Ókinishke qaraı, munyń bizdiń oblysqa da qatysy bar. Sonymen qatar kúni búgin BQO boıynsha sybaılas jemqorlyqqa qarsy qyzmet demeýshilerdiń qarajatynan urlaý belgileri boıynsha sotqa deıingi tergep-tekserýdi bastady. Zardap shekkenderge kómek kórsetýge arnalǵan aqshamen baılanysty qylmystyq isterdi tirkeýdiń birneshe faktisin jáne qarjylandyrýdyń «Aqjaıyq» jeke qory arqyly júrgizilgenin eskere otyryp, onyń qaıyrymdylyq qarajatyn paıdalanýǵa qatysty qyzmeti tekseriletin bolady, — dedi Dáýren Omarǵalıev.

Eske sala keteıik, budan buryn Batys Qazaqstanda tasqyn sýdan keler qaýip qandaı ekendigin jazǵan bolatynbyz.