Sý tasqyny: BQO-da 32 myń adam syıatyn 317 ýaqytsha ornalastyrý pýnkti daıyn

ORAL. KAZINFORM - Batys Qazaqstan oblysynda azamattyq qorǵaýdyń memlekettik júıesi joǵarǵy daıyndyq rejımine kóshirildi.

BQO TJD tótenshe jaǵdaılardyń aldyn alý basqarmasy bastyǵynyń mindetin ýaqytsha atqarýshy Ismaıl Azamattyń málim etkenindeı, osy aıdyń sońyna taman «Sý tasqyny — 2025» aılyǵy bastalady.

Onyń aıtýynsha, oblys boıynsha 1 817 tehnıka, 123 júzý quraly, 455 motopompa, jeke quramnan 4 126 adam sý tasqynyna qarsy sharalarǵa daıyn. Sondaı-aq 2 162 tonna ınertti materıal, 510 myń dana qapshyq, 423 tonna janar-jaǵar maı, 655 tonna azyq-túlikke 195 kelisimshart ázir. 

— Budan bólek, topyraq salynǵan 62 myńnan astam qap qala men aýdandarda qoımalarda saqtalyp tur. Oǵan qosa 32 myń adamdy qabyldaı alatyn 317 ýaqytsha ornalastyrý pýnkti jáne úı janýarlaryn qaýipsiz jerge kóshirý úshin 195 oryn daıyn, - deıdi I. Azamat.

Ol sonymen qatar oblys ózenderinde 5 brıgadanyń muz jarý jumystaryn júrgizýi úshin kelisim-shart jasalatynyn tilge tıek etti.

Atap aıtar bolsaq, ózenderde monıtorıngti jaqsartý maqsatynda burynnan bar 22 gıdrobeketke jańadan qosymsha jeteýi ashyldy. Sonymen qatar Jaıyq, Shaǵan, Derkól ózenderinde sý tasqyny qaýpin aldyn ala anyqtaýǵa arnalǵan 3 avtomattandyrylǵan keshendi ornatý jumystary júrgizilip jatyr. 

Eske sala keteıik, budan buryn Batys Qazaqstanda tasqyn sýdan keler qaýip qandaı ekenin jazǵan bolatynbyz.