Sý tasqyny: BQO-da 317 ýaqytsha ornalastyrý pýnkti 32 myń adamdy qabyldaı alady

BQO TJD tótenshe jaǵdaılardyń aldyn alý basqarmasynyń bastyǵy Nuraly Músıevtiń óńirlik kommýnıkatsııalar qyzmeti alańynda ótken brıfıngide málim etkenindeı, aılyq aıasynda avtojoldarda 600-ge jýyq qubyr, eldi mekenderde 300 km aryq tazartyldy. 

Onyń sózine qaraǵanda, ózenderde 13 myńnan astam oıyq burǵylanyp, 180 sharshy metr muz kesildi. 30 myń sharshy metr jer qaralyp, 4 myń sharshy metr qamys shabyldy. Kúni búginge deıin oblys boıynsha 1 mln tekshe metrge jýyq qar shyǵaryldy. 

2 naýryzdan bastap Oral qalasy, Aqjaıyq, Jánibek, Báıterek, Tasqala, Syrym aýdandarynda 20 myń sharshy metrden astam aýmaqta muz jarý jumystary júrgizildi. Jumystar Bórli jáne Shyńǵyrlaý aýdandarynda jalǵasyp jatyr. Budan bólek muz júrý kezinde muz jarý brıgadalarynyń kezekshiligi uıymdastyrylady. 

TJD málimetine sáıkes sý tasqyny kezeńinde tótenshe jaǵdaılardy boldyrmaý jáne joıý úshin 2 009 tehnıka, 128 júzý quraly, 482 motopompa, jeke quramnan 4 568 adam daıyndyqqa keltirildi. Sondaı-aq Oral qalasy men aýdan ákimdikteri 7 myń tonna ınertti materıaldar, 336 990 dana qap (onyń ishinde 70 myńy qaptalǵan), 423 tonna janar-jaǵar maı ázirledi. 

– Jaǵdaı kúrdelengen jaǵdaıda,Tótenshe jaǵdaılar departamenti 4 eshelon boıynsha 159 adam, 56 tehnıka, 18 motopompa jáne 22 júzý quralyn iske qosatyn bolady. Sonymen qatar áýejaıda «Kazavıaqutqarý» AQ uıymynyń bir ushaǵy (Mı-8) kezekshilik rejıminde tur. Oblystaǵy ahýal odan saıyn qıyndasa, Mańǵystaý, Qyzylorda oblystarynyń TJD men 20982-áskerı bóliminen 196 adam, 27 tehnıka, 7 júzý quraly men 36 motopompany tartý qarastyrylǵan. Kúni búgin 32 myń adamdy qabyldaı alatyn 317 ýaqytsha ornalastyrý pýnkti daıyn, - dedi N.Músıev. 

Eske sala keteıik, budan buryn BQO ózenderinde muz jarý jumystary qalaı júrgizilip jatqanyn jazǵan edik.

BQO-da qaı ózenderden eldi mekenderge qaýip tónýi yqtımal ekeni habarlandy.