Sý tasqyny: Bektenov jaýapty vedomstvolarǵa 5 naqty tapsyrma júktedi
ASTANA. KAZINFORM — Úkimet basshysy Oljas Bektenov sý tasqyny kezeńindegi atqarylýy tıis sharalarǵa baılanysty tıisti vedomstvolarǵa 5 baǵyt boıynsha tapsyrma berdi.
— Aqtóbe, Atyraý, BQO, Qostanaı oblystarynda der kezinde qabyldanǵan sharalar sý tasqyny men shyǵyndardyń aldyn alýǵa múmkindik berdi. Degenmen, Soltústik Qazaqstan oblysynda Esil ózeninde sý deńgeıi kóteriledi dep boljanyp otyr. Shyǵys Qazaqstan oblysynyń taýly aýdandarynda áli de 50 paıyzǵa jýyq qar jatyr. Tótenshe jaǵdaılar mınıstrligine múddeli memlekettik organdarmen birlesip sý tasqyny jaǵdaıyna táýlik boıy monıtorıng júrgizýdi tapsyramyn, — dedi ol Úkimet otyrysynda.
Sondaı-aq Premer-mınıstr jaýapty vedomstvolar men atqarýshy organdarǵa 5 túrli tapsyrma júktep, bylaı dedi:
1. Aqmola, Abaı, Shyǵys Qazaqstan jáne Soltústik Qazaqstan oblystarynyń ákimdikteri sý tasqynyna baılanysty jaǵdaıdyń ýshyǵyp ketýine jol bermeý úshin barlyq sharalardy qabyldasyn. Jaýapkershilikpen ári shuǵyl qımyldap, ýákiletti memlekettik organdar men memlekettiń basshylyǵyn habardar etý qajet. Turǵyndarmen keri baılanys ornatyp, olardyń ótinishterine dereý qulaq asý kerek.
2. Sý resýrstary mınıstrligi men ákimdikter ásirese elimizdiń soltústik jáne shyǵys óńirlerinde ornalasqan sý qoımalary men obektilerindegi sýdyń deńgeıin erekshe baqylaýda ustasyn. Gıdrotehnıkalyq qurylystardyń qaýipsizdigin qamtamasyz etsin.
3. TJM, Іshki ister mınıstrlikteri men óńir ákimdikterine ahýal kúrdelene túsken jaǵdaıda, ony baqylaýda ustaýdy tapsyramyn. Qajet bolsa, qosymsha kúshter men quraldardy jumyldyrý kerek.
4. Kólik mınıstrligi óńir ákimdikterimen birge zaqymdanǵan jol ınfraqurylymyn qalpyna keltirý boıynsha sharalar qabyldasyn. Joldar men kópirlerdiń jaǵdaıyna turaqty túrde monıtorıng júrgizý qajet.
5. Ekologııa mınıstrligi aýa raıy boljamynyń nasharlaýyna qatysty aqparat alǵan kezde tıisti memlekettik organdardy jedel habardar etsin. Tsıfrlyq damý mınıstrligi sý tasqynyn boljaý jáne modeldeý jumystaryn jalǵastyrsyn. «Tasqyn» aqparattyq júıesin onyń jumystaryna qatysty aıtylǵan syn men anyqtalǵan kemshilikterdi eskere otyryp jetildirilsin.
Sonymen qatar, byltyrǵy sý tasqynyn eskere otyryp, tótenshe jaǵdaı zardaptaryn joıý jáne turǵyndarǵa kómek kórsetý máselesi boıynsha barlyq normatıvtik-quqyqtyq aktini ózektendirý jumysyn 1 apta merzimde aıaqtaý qajet.
Oljas Bektenov bul jumystardy úılestirý mindetin Qanat Bozymbaevqa júktedi.
Aıta ketelik Úkimet basshysy Oljas Bektenov Aqmola oblysyndaǵy sý tasqynyna qarsy sharalar óz tıimsizdigin kórsetkenin aıtyp, óńirde qaýipsizdik josparyn qaıta qaraýdy tapsyrǵan edi.