Sý tasqyny: Batys Qazaqstanda 7 myńdaı adam evakýatsııalandy
ORAL. KAZINFORM — Batys Qazaqstan oblysynda sý tasqynyna baılanysty 7 myńdaı adam evakýatsııalandy.
BQO TJ departamentiniń aǵa ınjeneri Nurjan Tóleýishtiń málim etkenindeı, sonyń 3 myńnan astamy – balalar. Onyń aıtýynsha, qazirgi ýaqytta 1 myńnan astam adam evakýatsııalyq pýnktterde ornalassa, qalǵandary jaqyn-jýyqtaryna ketti.
«Keıingi táýlikte 141 adam kóshirilse, sonyń 43-i – balalar. Evakýatsııalaý jumystary Terekti jáne Bórli aýdanynda júrgizildi. Terekti aýdany Uzynkól sý qoımasy baqylaýda. Drondar jumys jasap jatyr. Bórli aýdanynda Elek ózeniniń deńgeıi 703 santımetrge kóterilýine baılanysty Dımıtrov jáne Qarashyǵanaq eldi mekenderinen 25 adam Jarsýat aýylyna evakýatsııalandy. Elek ózeniniń sýy 15 santımetrge tústi degen resmı habar aldyq. Qaýipti aýmaqtarda turǵyndarǵa túsindirý jumystary júrgizilýde. 10 eldi meken burynǵysha kólik qatynasynsyz qalyp otyrsa, 13 joldyń ústimen sý ótken. 60 jol ýchaskesin sý shaıǵan», - dedi N.Tóleýishev.
Nurjan Maratulynyń sózine qaraǵanda, oblys boıynsha 1 mln astam tekshe metr sý sorylyp, 200 myńnan astam qapshyq tóseldi. Apattyq-qutqarý jumystaryna 1900-den astam adam (365 tehnıka, 76 sý soratyn motopompa) jumyldyryldy. TJ, jergilikti atqarýshy organdar kúshterimen qatar Ulttyq ulan jaýyngerleri, Mańǵystaý oblysynan kelgen qutqarýshylar atsalysýda.
Eske sala keteıik, budan buryn Jaıyq ózeni Oral qalasy tusynda 10 metrge kóteriletini týraly jalǵan aqparat taraǵanyn jazǵan bolatynbyz. Sondaı-aq Oral qalasynda zardap shekken turǵyndardan ótinish qabyldaý bastaldy.
