Sý tasqyny: Batys Qazaqstanda 2 300-ge jýyq adam evakýatsııalyq pýnktterde jatyr
ORAL. KAZINFORM — Batys Qazaqstan oblysynda 13 ýaqytsha ornalastyrý pýnktinde 2 299 adam jatsa, sonyń 1 071-i – balalar.
BQO sanıtarııalyq-epıdemıologııalyq baqylaý departamenti basshysynyń orynbasary Gúldana Kereevanyń óńirlik kommýnıkatsııalar qyzmeti alańynda ótken brıfıngte málim etkenindeı, mundaı pýnktter Qaratóbe, Terekti, Bórli, Báıterek aýdandary men Oral qalasynda ornalasqan.
Gúldana Qaıyrjanqyzynyń sózine qaraǵanda, barlyq pýnktte úsh mezgil ystyq tamaq uıymdastyrylǵan. Atap aıtqanda, Qaratóbe, Terekti, Báıterek aýdandarynda jáne Oral tehnologııalyq kolledjinde turǵyndar ortalyqtandyrylǵan túrde (as blogynan) tamaqtandyrylady. Al Bórli aýdany men Oral qalasynda ystyq tamaqty JShS jáne jeke kásipkerlik ókilderi daıyndap, avtokólikpen jetkizedi.
«Barlyq ýaqytsha ornalastyrý pýnktinde aýyz sý rejımi uıymdastyrylyp, saqtalady. Aýyz sýdy paıdalaný úshin ydys-aıaq bólingen. Evakýatsııalyq pýnktter tósek-oryndarmen jetkilikti qamtamasyz etilgen. Pýnktter kúnine eki ret jýylyp, tazalyq jumystary dezınfektsııalaý quraldaryn qoldana otyryp júrgiziledi. Sondaı-aq bizdiń mamandar pýnktterde kezekshilik etedi. Bas sanıtar dárigerdiń 2024 jylǵy 4 sáýirdegi qaýlysyna sáıkes atalǵan oryndarda táýlik boıy kezekshilik uıymdastyrylǵan», - dedi G.Kereeva.
Eske sala keteıik, budan buryn Oralda jaýyngerdiń jalǵyz ózi 30-ǵa jýyq adamdy tasqyn sýdan aman alyp shyqqanyn jazǵan bolatynbyz.
Sondaı-aq Oralda jeti balabaqsha ýaqytsha jabyldy.
