Sý tasqyny: Batys Qazaqstanda 13 myńnan astam adam evakýatsııalandy
ORAL. KAZINFORM — Batys Qazaqstan oblysynda sý basý qaýpi tóngen jerlerden barlyǵy 13 068 adam evakýatsııalandy.
QR TJM jedel shtabynan túsken málimetke qaraǵanda, sonyń 19-y – múgedekter, 5 472-si – balalar. 11 249 adam týysqandarynyń úıine ketse, 1 819-y (877-si – balalar) evakýatsııalyq pýnktterde turyp jatyr.
Oblys boıynsha sý shaıǵan 63 jol baqylaýda. Kúni búginge deıin 9 eldi meken qatynassyz qalyp otyr. 830 saıajaı úıi sýǵa ketti.
Batys Qazaqstanda 4 886 bas mal qaýipsiz jerlerge aıdaldy. 2 402 mal ólimi tirkeldi.
«Óńirde tikushaqtarmen - 31 myń, avtokólikpen – 60 myń, temirjol kóligimen 134 myń kg gýmanıtarlyq júk jetkizildi. TJ jáne ákimdikter kúshterimen 1 mln 20 myńnan astam tekshe metr sý sorylyp, 423 myńnan astam qap tóselip, 3 219 myń tonna ınertti materıal ázirlendi. Apattyq-qutqarý jumystaryna 5 271 adam, 825 tehnıka, 7 sý soratyn motopompa, 14 júzý quraly, 2 tikushaq tartyldy» dep habarlady vedomstvodan.
Eske sala keteıik, budan buryn Oralda zoobaqtaǵy janýarlar men qustardyń qaýipsiz jerge kóshirilgenin jazǵan bolatynbyz.
