Sý tasqyny: Batys Qazaqstan oblysynda sýǵa ketken 552 úıdiń 292-si jaramsyz
ORAL. KAZINFORM — Batys Qazaqstan oblysynda aldyn ala boljam boıynsha 6 aýdan men Oral qalasynda 552 turǵyn úıdi sý basty.
BQO ákiminiń orynbasary Qalııar Aıtmuhambetovtiń brıfıngide málim etkenindeı, sýǵa ketken úılerdiń 292-si jaramsyz. 145-sinde áli sý tur. Qalııar Shadııarulynyń sózine qaraǵanda, sýǵa ketken úıler sany áli naqtylanady. Budan bólek Oral qalasy mańyndaǵy 427 saıajaıdy sý basyp, 440 adam qaýipsiz jerge kóshirildi.
Oǵan qosa Terekti aýdanynda Uzynkól sý qoımasynyń shekten tys tolýyna baılanysty 5 eldi mekendi sý basý qaýpi týyndady. Soǵan baılanysty bes aýyldan 4 615 adam evakýatsııalandy. Qazir qoımada sý deńgeıi tústi. Degenmen qaýip tolyq seıilgen soń ǵana adamdar úılerine qaıtady.
«Oblys boıynsha barlyǵy 6 868 adam qaýipsiz jerge kóshirilse, sonyń 3 579-y – balalar. Evakýatsııalyq pýnktterde qajetti barlyq jaǵdaı jasalǵan. Sý tasqynynan zardap shekkenderge 2500-den astam volonterlar kómek kórsetýde. Kezekshilik uıymdastyrylyp, oqýshy balalar onlaın formatta bilim alyp jatyr. Mysaly, kúni keshe 14 mektepte 5 myńnan astam shákirt onlaın oqysa, búgin 10 mektepte 3 722 oqýshy qaldy. Sol sekildi sý tasqyny bastalǵannan beri evakopýnktterde ornalastyrylǵan 3 684 adamnyń 2 633-i mekenjaılaryna qaıtyp, qazir 1 051-i qaldy», - dedi Q.Aıtmuhambetov.
Onyń aıtýynsha, kórshiles Reseıden bastaý alatyn 5 transshekaralyq ózende sý deńgeıiniń kóterilýi jurtshylyqty alańdatyp otyr. Budan birneshe kún buryn Saratov oblysy aýmaǵynda ornalasqan Prıýzen sý qoımasynan Kaztalov jáne Jańaqala aýdandaryna baratyn Qaraózenge jiberilgen sý kólemi sekýndyna 550 tekshe metrge jetti. Der kezinde qabyldanǵan sharalardyń arqasynda birde-bir eldi mekendi sý basýyna jol berilgen joq. Sý óziniń arnasymen ketip jatyr. Kúni búgin atalmysh qoımadan sekýndyna 440 tekshe metr sý berilip jatyr.
«Qazirgi tańda Orynbor oblysyndaǵy Irıkla sý qoımasynan, sondaı-aq Saqmar, Elek, Shyńǵyrlaý jáne basqa shaǵyn ózenderden Jaıyqqa óte kóp mólsherde sý quıylyp jatyr. Soǵan baılanysty Jaıyq pen Shaǵanda sý deńgeıiniń kóterilýi saldarynan Oral qalasy men Báıterek, Terekti aýdandaryn sý basý qaýpi seıilgen joq», - dedi Q.Aıtmuhambetov.
Oblys ákiminiń orynbasary sý tasqyny saldarynan 179 iri qara, 47 jylqy, 60 shoshqa, 1 442 usaq mal, 119 úı qusy shyǵynǵa ushyraǵanyn jetkizdi.
«Derkól ózeninde sý deńgeıi tústi. Shaǵanǵa da Reseı jaǵynan túsetin sý azaıdy degen habar alyp otyrmyz. Eger eki-úsh kúnniń ishinde Shaǵannyń sýy kúrt tómendep, aǵysymen ótip ketse, onda jeńildeıdi. Al Jaıyq ózeniniń deńgeıi 800-850 santımetrden assa, onda qaýip kúsheıedi. Shaǵanǵa sý keri qaraı lyqsyp, qalanyń birqatar aýdanyn sý basýy yqtımal. Qazirgi tańda qaýipti aýmaqta qalǵan 5 myńnan astam adamdy kóshirý jumystary júrgizilýde», - dedi Oral qalasynyń ákimi Mırjan Satqanov.
«Qazgıdromet» RMK BQO fılıalynyń dırektory Tilegen Shapanovtyń naqtylaýynsha, qazirgi kezde Orynbordaǵy Irıkla sý qoımasynan Jaıyqqa sekýndyna 2 175 tekshe metr sý jiberilip jatyr. Bul – Irıkla sý qoımasy 1957-1958 jyldary salynǵannan beri tarıhta bolmaǵan jaǵdaı. Oǵan qosa Jaıyqtyń iri salasy – Saqmar ózeni bir táýlikte 190 santımetrge kóterilip, 750 santımetrge (qaýipti shegi – 870 sm) jetti.
«Qazir Irıkla sý qoımasy 100 paıyzǵa toldy deýge bolady. Bul – oǵan qansha kólemde sý kelse, sonshasy tómengi aǵysqa quıylady degen sóz. Aldyn ala boljam boıynsha Jaıyq ózeni 850 santımetrge kóteriledi dep otyrmyz. Onda 1994 jylǵy jaǵdaı (853 sm) qaıtalanýy múmkin. Sonymen qatar 1957 jyly Oral qalasy tusynda Jaıyq sýy 933 santımetrge jetkeni málim. Osynyń bárin eskere otyryp, jumystanatyn bolamyz. Onyń ústine 6 sáýir kúni oblysta nóser jaýyn jaýmaqshy», - dedi T.Shapanov.
Eske sala keteıik, budan buryn Oral qalasynda zardap shekken turǵyndardan ótinish qabyldaý bastalǵanyn jazǵan bolatynbyz.
Sondaı-aq Batys Qazaqstanda 7 myńdaı adam evakýatsııalandy.
Oralda polıtseıler shatyrdaǵy saıajaı turǵynyn qutqardy.
