Sý tasqyny: Batys Qazaqstan oblysynda 5 927 turǵyn úı jáne saıajaı zaqymdanǵan
ASTANA. KAZINFORM — QR Ónerkásip jáne qurylys mınıstri Qanat Sharlapaev qurylys jumystarynyń barysyn tekserý úshin taǵy da Batys Qazaqstan oblysynda bardy.
Jumys sapary aıasynda ol Qaratóbe aýdany Qorjyn, Syrym aýdanyndaǵy Jympıty, Bulanty jáne Óleńti, Terekti aýdanyndaǵy Ańqaty jáne Podstepnoe aýyldarynda salynyp jatqan úılerdi aralady.
Batys Qazaqstan oblysynda 5 927 turǵyn úı jáne saıajaı zaqymdanǵan. Tehnıkalyq zertteý qorytyndysy boıynsha 1 383 nysan ǵana jaramdy dep tanylǵan. Sonymen qatar, 922 otbasy jóndeý jumystaryna qarajat aldy. Qazirgi ýaqytta 775 turǵyn úı salynýda, sonymen qatar 2 248 turǵyn úı nemese páterdi satyp alý josparlansa, onyń 871 páteri satyp alyndy.
Qanat Sharlapaev 775 úıdiń qurylysyn tekserdi, onyń 34 turǵyn úıi Oral q., 401 turǵyn úıi aýyldyq jerlerde ornalasqan. Mınıstr Bórli aýdanynda 60 turǵyn úıdiń, Terekti aýdanynda 131 turǵyn úıdiń, Qaratóbe aýdanynda 90 turǵyn úıdiń, Báıterek aýdanynda 6 turǵyn úıdiń, Syrym aýdanynda 114 turǵyn úıdiń qurylys alańdaryn aralady.
401 úıdiń qurylysyna 30-ǵa jýyq kompanııa qatysatynyn aıta ketken jón. Qurylys-montaj jumystarynyń kólemi josparlanǵan aýqymnyń 50 paıyzynan asty, jumystardy aǵymdaǵy jyldyń tamyz aıynda aıaqtaý josparlanýda.
Sonymen qatar, Mınıstr munaı men gazdy óndirý men óńdeýge arnalǵan joǵary tehnologııalyq jabdyqtardy ázirleý jáne shyǵarýmen, munaı men gazdy tasymaldaýǵa arnalǵan energetıkalyq jabdyq, kúrdeli metall qurylymdary, qurylys jabdyqtary, basqa da mashına jasaý ónimderin óndirýmen aınalysatyn «Batys Qazaqstan mashına jasaý kompanııasy» AQ-da bardy. Kásiporynnyń taýarlary Saýd Arabııasy, BAÁ, Katar, Aljır, Ázirbaıjan jáne t.b. elderge de eksporttalady.
Qanat Sharlapaev Batys Qazaqstan oblysynyń ákimdiginde keńes ótkizip, onda óńirdegi qalpyna keltirý jumystarynyń ózekti máseleleri talqylandy.
