Batys Qazaqstan oblysynda 1 591 bas mal ólgen, shyǵyn qalaı ótelmek
ORAL. KAZINFORM — Sý tasqyny kezinde Batys Qazaqstan oblysynda ólgen mal sany 1500-den asty.
BQO ákimdiginen túsken málimetke qaraǵanda, Bórli aýdanynda Aqsý, Keńtúbek, Qaraǵandy, Pýgachev, Qaratóbede Qorjyn, Shalǵyn, Terektide Ańqaty, Podstepnyı jáne Syrymda Jympıty, Buldyrty, Óleńti, Qosoba aýyldaryn sý basýyna baılanysty malǵa da shyǵyn keldi.
«Qutqarý jumystary barysynda 1 431 iri qara (Aqjaıyq aýdanynda – 300, Terekti – 173, Syrym – 447, Bórli – 460, Oral qalasy – 51), 2 091 usaq mal (Terekti – 319, Syrym – 731, Bórli – 955, Oral qalasy – 86) jáne 33 bas jylqy (Bórli – 31, Terekti – 2) qaýipsiz jerlerge shyǵaryldy. Aýdandarda qurylǵan arnaıy komıssııalar sý tasqynynan ólgen mal sanyn anyqtaý jumystaryn júrgizýde. Aldyn ala málimet boıynsha oblysta sý tasqyny saldarynan 139 iri qara, 39 jylqy, 1 413 qoı-eshki, barlyǵy 1 591 mal, 112 úı qusy shyǵynǵa ushyrady», - dep habarlady vedomstvodan.
Mamandardyń sózine qaraǵanda, negizinen turǵyndardyń jeke maldary ólgen. BQO veterınarııa basqarmasynyń bólim basshysy Nurqaıyr Qusaıynovtyń aıtýynsha, sý tasqynynan ólgen janýarlar jóninde qujattar jergilikti ákimdikterde jınaqtalady.
«Qazaqstan Respýblıkasy Úkimetiniń 2014 jylǵy 19 jeltoqsandaǵy «Tabıǵı sıpattaǵy tótenshe jaǵdaılar saldarynan zardap shekkenderge keltirilgen zııandy (nuqsandy) óteý qaǵıdalaryn bekitý týraly» № 1358 qaýlysyna sáıkes zardap shekkenderge keltirilgen zııan jergilikti atqarýshy organdardyń Qazaqstan Respýblıkasynyń bıýdjet zańnamasyna sáıkes tabıǵı sıpattaǵy tótenshe jaǵdaılardyń saldaryn joıýǵa kózdelgen bıýdjet qarajaty esebinen nemese uıymdardyń qarajaty, azamattardyń, qorlardyń jáne qoǵamdyq birlestikterdiń erikti jarnalary, Qazaqstan Respýblıkasynyń zańnamasyna qaıshy kelmeıtin ózge de kózder esebinen óteledi», - dedi N. Qusaıynov.
Atalǵan qaýlyǵa sáıkes zardap shekkender tótenshe jaǵdaı týyndaǵan kúnnen bastap kúntizbelik otyz kún ishinde jergilikti atqarýshy organǵa materıaldyq nuqsandy óteý týraly ótinish beredi. Zardap shekkenniń keltirilgen zııandy óteý týraly jeke júginýge múmkindigi bolmaǵan jaǵdaıda onyń týystary nemese ózge adamdar, sondaı-aq eger zardap shekken adam kámelettik jasqa tolmaǵan bolsa, onyń zańdy ókilderi senimhat negizinde júgine alady. Bul ótinish on bes jumys kúni ishinde qaralady. Sondaı-aq jergilikti atqarýshy organ ótinish tirkelgen kúnnen bastap on jumys kúni ishinde baǵalaýshynyń keltirilgen nuqsannyń mólsherin baǵalaýyn uıymdastyrady. Bul rette baǵalaý júrgizýdi uıymdastyrýǵa baılanysty shyǵystar jergilikti atqarýshy organǵa júkteledi. Baǵalaýshy qorytyndy shyǵarǵannan keıin úsh jumys kúni ishinde jergilikti atqarýshy organ bıýdjetti atqarý jónindegi ýákiletti organmen kelisilgen qarajat bólý týraly sheshim qabyldaıdy. Zardap shekkenderge tólem tıisti sheshim qabyldanǵannan keıin kúntizbelik otyz kún ishinde júzege asyrylady.
«Eń bastysy, zardap shekken turǵyndar ýaqyt ótkizbeı jergilikti atqarýshy organǵa ótinishin berýi kerek», - dedi N. Qusaıynov.
Aıta keter jaıt, qaýlydaǵy qaǵıda talaptary Qazaqstan Respýblıkasynyń sáýlet, qala qurylysy jáne qurylys qyzmeti týraly zańnamasyna sáıkes jyljymaıtyn múlik obektilerine jatpaıtyn ýaqytsha qurylystarǵa, sharýashylyq-turmystyq jáne ózge de salynǵan qurylystarǵa, sondaı-aq zańsyz salynǵan obektilerge, baǵaly kıimge, sán-saltanat zattaryna ne baǵaly metaldardan jasalǵan, kórkemdik qundylyǵy bar zattarǵa, sondaı-aq tótenshe jaǵdaılar týyndaǵan kezde saqtandyrý obektisi bolyp tabylǵan, Qazaqstan Respýblıkasynyń azamattyq zańnamasymen aıqyndalǵan tártippen saqtandyrýshynyń qarajaty esebinen óteýge jatatyn múlikke qoldanylmaıdy.
Eske sala keteıik, budan buryn sý tasqyny kezinde Batys Qazaqstanda ólgen mal sany 1 myńnan asqanyn jazǵan bolatynbyz.
