Sý tasqyny bastalsa, jergilikti basshylar sheshim qabyldaı alady – TJ mınıstri

ASTANA. KAZINFORM – QR Tótenshe jaǵdaılar mınıstri Shyńǵys Árinov Úkimet otyrysynda sý tasqyny jaǵdaıyna qandaı tehnıkalar ázirlengenin jáne qandaı jospar qurylǵanyn baıandady.

«Shyńǵys Saıranuly, eger ahýal kúrt nasharlap ketse, qandaı shuǵyl sharalar qabyldaısyzdar? Josparlaryńyz bar ma?», - dep suraq qoıdy QR Premer-Mınıstri Oljas Bektenov Úkimettiń búgingi otyrysynda. 

Óz kezeginde Shyńǵys Árinov qajetti jospar ázirlengenin aıtty. 

«Kóktem» oqý-jattyǵý aıasynda bári tekserildi – 39 myń adam men kúsh quraldar, 11 myńǵa jýyq tehnıka, 400-den astam júzý quraly, 18 tikushaq jáne 3 myńnan asa motopompa daıyn. Munyń bári tez jumyldyrylady. 

Sondaı-aq meniń tarapymnan óńirlerdegi tótenshe jaǵdaılar departament basshylaryna tıisti quzyret berilgen. Olar tez arada eshqandaı bıýrakratııasyz, kelisimsiz sheshim qabyldaı alady. Mınıstrlik tarapynan barlyq koordınatsııa iske asyrylady», - dedi Tótenshe jaǵdaılar mınıstri. 

Premer-Mınıstr kez kelgen jaǵdaıǵa daıyn bolý keregin tapsyrdy. 

Buǵan deıin Shyńǵys Árinov kóktemde elimizdiń 10 óńirinde sý tasqyny qaýpi boljanyp otyrǵanyn aıtqan edi.