Sý tasqyny bastalǵaly 113 myń adam evakýatsııalandy
ASTANA. KAZINFORM – QR TJM Azamattyq qorǵanys jáne áskerı bólimder komıtetiniń aǵa ofıtseri Erasyl Saıpash eldegi sý tasqyny boıynsha jańa derekterdi baıandady.
Sý tasqyny bastalǵaly beri barlyǵy 113 867 adam, onyń ishinde 39 943 bala qutqarylyp, evakýatsııalandy, 112 539 mal qaýipsiz jerge aıdaldy. Osy saǵatta 15 125 adam óz úılerine oraldy. 6 704 adam, onyń ishinde 3 052 bala evakýatsııalaý pýnktterinde jatyr.
«Aqtóbe, Qostanaı, Aqmola, Atyraý, Soltústik Qazaqstan oblystarynda 5 732 jeke turǵyn úı, 1 579 aýla aýmaǵy jáne 2 035 saıajaı úıleri sý astynda qalýda. 3 570 turǵyn úı men 2 225 aýla aýmaǵynan sýdyń baǵyty buryldy», - dedi E.Saıpash Respýblıkalyq aqparattyq shtabta ótken brıfıngide.
Sý tasqyny saldaryn joıý,sý tasqynyna qarsy is-sharalar men avarııalyq-qutqarý jumystary jalǵasýda. 9,7 mln astam tekshe metr erigen qar sýy soryp shyǵaryldy, 2,4 mln qapshyq jáne 1,2 mln astam tonna ınertti materıal tóseldi.
Avarııalyq-qutqarý jáne sý tasqynyna qarsy jumystarǵa 33 391 adam, 4 470 tehnıka, 890 sý sorý quraly, 392 júzý quraly, 18 áýe kemesi jumyldyrylǵan. TJM psıhologtary jergilikti jerlerde jáne jedel jeli telefondary arqyly azamattarǵa shuǵyl psıhologııalyq kómek kórsetýdi jalǵastyrýda. Jedel jelige túsken 1 816 qońyraý pysyqtaldy.
