Sý tasqyny: Bankterge 6 myńǵa jýyq aqtóbeliktiń tizimi jiberildi
AQTÓBE. KAZINFORM - Aqtóbede 5900 jeke tulǵanyń jáne 200-ge jýyq zańdy tulǵanyń nesıesin keıinge shegerý úshin tizimi alyndy. Tizim Qarjy naryǵyn retteý jáne damytý agenttigine jiberildi.
Aqtóbe oblysynyń ákimi ekinshi deńgeıli bank ókilderimen kezdesip, nesıeni keıinge shegerý kezindegi kedergilerdi talqylady. Tek jeke tulǵalardyń emes, kásipkerlerdiń de osyndaı múmkindigi bar. Alaıda keıbir bankte júıe rettelmegen.
«Adamdar qoǵamdyq shtab múshelerine júgingen. Mysaly, «Bereke bank» tólemderdi eki aıǵa keıinge shegerip, biraq kelesi aılarda tólemdi eki ese qaıtarý shartyn usynypty. Demek, adam aıyna birden eki ese tólem jasaıdy. Olaı bolmaýy kerek. Nesıeni qaıtarý qaryzy boıynsha keıinge qaldyrý sý tasqynynan zardap shekken adamdarǵa qıyn kezeńde olardy qoldaý maqsatynda beriledi», - dedi oblys ákimi Ashat Shaharov.
Aıta keteıik, Aqtóbe qalasy men aýdandardyń ákimdikteri zardap shekkenderdiń tizimin jasap, Qarjy naryǵyn retteý jáne damytý agenttigine jiberdi. Qazirgi tańda oblys boıynsha zardap shekken 5 900 jeke jáne 200-ge jýyq zańdy tulǵanyń tizimi joldandy. Aqtóbe oblysy ákiminiń baspasóz qyzmetiniń habarlaýynsha, búginde Agenttik zardap shekken aımaqtardyń tizimin quryp, ony barlyq ekinshi deńgeıli bankterge jibergen.