Sý tasqyny: Atyraýdaǵy Taldykól aýylynyń turǵyndary úıine oraldy

ATYRAÝ. KAZINFORM – Sý tasqynynan tóngen qaýipke baılanysty Atyraý qalasyna kóshirilgen Taldykól aýylynyń turǵyndary úıine oraldy. 

Mahambet aýdany ákiminiń orynbasary Arman Ádilǵalıevtiń aıtýynsha, Beıbarys aýyldyq okrýgine qarasty Taldykól aýylyna baratyn joldyń bir shaqyrymy ýaqytsha qalpyna keltirilgen.

«Atyraý-Oral trassasynan Taldykól aýylyna baratyn 7 shaqyrym joldy tasqyn sý basty. Soǵan baılanysty aýyl turǵyndary Atyraý qalasyna evakýatsııalanǵan edi. Búgin H.Dosmuhamedov atyndaǵy Atyraý ýnıversıteti men ARES joǵary kolledjiniń jataqhanalarynda ashylǵan evakýatsııalyq pýnktterge ornalasqan 147 turǵyn aýylǵa oraldy», - dedi Arman Ádilǵalıev.

Taldykól aýylynyń turǵyndaryn evakýatsııalaýǵa jaýapty úılestirýshi Dýlat Hamzınniń aıtýyna, turǵyndar úsh avtobýspen tasymaldanǵan.

«Qazir tasqyn sýdyń deńgeıi tómendep keledi. Degenmen, aýylǵa baratyn joldyń eki jaǵynda áli de mol sý tur. Sondyqtan, turǵyndardy balalardy jol boıyndaǵy sýǵa, bóget boıyna jibermeı, qaýipsizdik sharalaryn saqtaýǵa shaqyramyn», - dedi Arman Ádilǵalıev.

Ákim orynbasarynyń deregine qaraǵanda, Taldykól aýylynda táýlik boıy kezekshilikti atqarý jalǵasyp jatyr. Qaýipsizdik sharalaryna tótenshe jaǵdaılar jáne polıtsııa departamentteriniń, jergilikti atqarýshy organnyń qyzmetkerleri, aýyl turyndary tartylǵan.

Eske sala ketelik, buǵan deıin Mahambettegi Taldykól aýylynyń turǵyndaryn májbúrli evakatsııalaý bastalǵanyn habarlaǵan edik.

Keıin Taldykól turǵyndary úıine qaıyqpen oralyp jatqanyn jazǵan bolatynbyz.